16/11/2017
「娥特」做東齊聚舊 葉劉最愛雞兩舊
所謂:「相見好,同事難!」做同事嘅平日會一齊食Lunch或者放工飲返杯,已經唔錯,如果同事即使辭咗職或者退咗休之後,都仲會成日約出嚟食飯,就係真係可謂真.朋友喇!要好好珍惜啊!就好似葉劉咁。葉劉噚晚同啲舊政務官聚會,仲要係由好妹妹兼前對手「娥特」林鄭月娥做東添!大家感情睇嚟仲好好噃!
前AO輪流做東聚舊
葉劉噚晚喺Facebook出Post,一開頭就話:「與我同年代加入政府的前政務官,很多都已退休了,但大家仍經常舉行飯局,輪流做東熱鬧一番」,Jenny真係好葡萄啊!事關小妹有排都未有得退休,而家要約舊同學食餐飯,夾個時間、揀間餐廳已經要用個幾月時間,分分鐘要約到下年復活節先得!
有得同朋友聚舊仲有「娥特」做東,葡萄死Jenny喇!
平凡是雞葉劉Like
嗱!既然係「娥特」做東,就當然唔使好似Jenny咁為食乜而諗到頭都爆啦!直接去禮賓府,咪咩都有得食囉!葉劉都同大家分享咗今次聚會有咩好餸食,仲大讚禮賓府大廚的手藝「非常好」,有唔少精緻菜式。不過葉劉就話,最得佢歡心嘅,竟然係一份普普通通嘅海南雞飯!看來葉劉都好明白,愈平凡嘅菜式就愈顯功架!
就係呢兩舊海南雞深得葉劉歡心喇!
除咗食飯,「娥特」仲帶咗班舊同事參觀佢主理裝修之後嘅禮賓府,葉劉仲讚「娥特」十分客氣添!睇嚟特首選戰未有傷到兩位阿太和氣噃!真係要唱返句:「人生有個真正朋友的確好極!」喇!
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
《說說心理話》【奧運劍擊熱】大師兄張小倫親身分享!贏在起跑線=壓力?如何培育子女有卓越成就?► 即睇