06/11/2017
垃圾徵費後年嚟 膠袋都要有防偽?
香港人一般都好少亂拋垃圾,捉到要罰款千五呀嘛!不過雖然唔會「亂拋」,但係平日拋咗出嚟嘅垃圾數字都唔可以睇少,Jenny成日睇到有報道話香港每日要丟幾多車垃圾去堆填,都咪話唔驚。之前政府終於話研究咗好耐嘅垃圾徵費,最快會喺2019年底正式落實,之不過坊間對垃圾徵費仲有好多疑問,Jenny今日就去咗環境諮詢委員會,睇吓到底點解決呢啲問題喇!
縮窄回收筒 難為了媽媽
其實鄰近國家同地區一早有垃圾徵費嘅做法,Jenny都覺得一講到錢,香港人就最積極。但係開講有話:「上有政策,下有對策」,雖然垃圾徵費係好事,但係都難保有啲人會逃避嘅!例如有委員就問到,如果有啲人會將垃圾當係回收物品,一大袋咁棄置到回收筒點算呢?環保署助理署長劉陳淑珍就話,唔使擔心,因為而家當局會檢討回收桶的設計,例如三色回收筒,藍色紙箱嘅入口會設計成又扁又長,黃色鋁罐箱就會設計成只放得入一個鋁罐嘅窿。吓?Jenny聽落,咁樣咪好難方便到市民一大袋咁樣回收物品囉?你知啦,好多媽媽都習慣每樣物品收集成一大袋先攞落去樓下回收,如果要逐個逐個咁放入去,相信都冇乜幾多個人肯咁做喇!劉太就解釋,話呢個設計淨係比一啲無人看管嘅公共空間,避免有啲人濫用啫!叫大家唔使擔心喎!但係影唔影響到公眾,Jenny都係覺得好有疑問。
有委員就問,當局會唔會擔心有啲市民為咗慳返啲膠袋費,將啲廚餘棄置喺廁所,增加污水排放呢?環保署副署長吳文傑就話,其實買垃圾膠袋一個月可能都只係用30蚊,但係如果為咗慳呢30蚊,整塞咗個廁所代價就更加大啦!相信香港市民唔會為咗慳返垃圾膠袋而做一啲令到廁所淤塞嘅行為嘅!至於市面以後會唔會因為呢個垃圾徵費,衍生咗「黑市袋」出嚟呢?有委員仲提議不如每個垃圾袋都加個QR Code上去,掃一掃咪一清二楚囉!Jenny真係覺得高手在民間,QR Code都可以應用喺垃圾袋上面,係有諗頭嘅!
QR Code 垃圾袋真係有得諗㗎!(設計圖片)
有無QR Code 要睇科技發展
不過,吳副署長一樣叫大家唔使擔心,因為當局已經參考過台北嘅做法,建議用防偽標籤做識別,令到假袋「有跡可尋」喎!咦?咁QR Code呢?原來吳副署長就話驚成本太高,所以都係用返香港最愛嘅防偽標籤就得喇!不過最尾又補返句,「我哋會留意而家啲科技發展」,睇嚟垃圾袋掃QR Code都仲係有得諗噃!
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】烏軍攻入俄國庫爾斯克州近兩周,並炸毀兩座重要橋樑,你認為俄烏戰爭會否急劇惡化?► 立即投票