政府今日終於公布埋剩低嘅兩個政治助理名單喇！佢哋就係財政司司長政治助理何翠萍，同埋食物及衞生局局長政治助理鄭守崗。二人都會喺下星期一開始返工。其實由7月特首林鄭上任，到而家11月都已經四個月，計埋佢哋，林鄭嘅新班子終於「齊腳」喇！難怪特首今日見記者嘅時候都話「十分欣慰」喇！Jenny都係咁話！

蘇B撻Q 守崗入局

　　財政司司長政治助理何翠萍，上次Jenny都有同大家介紹過，佢係財政司司長陳茂波（波叔）昔日嘅「對手」，做過商業電台嘅新聞及公共事務副總監，仲喺波叔第一次以財政司司長嘅身份發表《財政預算案》時仲質詢過佢添！Jenny估應該就係因為嗰次嘅質詢令二人惺惺相惜，由「對手」變「助手」喇！

　　至於另一位，食物及衞生局局長政治助理鄭守崗，睇返政府資料話，佢之前係喺醫院管理局服務轉型部做行政經理，負責策劃及推行臨床公私營協作計劃。Jenny都有印象喺醫管局嘅Event見過佢，不過論熟悉程度就梗係唔夠同行家出身嘅蘇敬恆（蘇B）熟啦！可惜蘇B埋門一腳都係入唔到局，政府就咁就少咗一位相熟嘅靚仔可以同我哋班行家吹吓水喇！話說回頭，Jenny都係時候摷返鄭生張卡片出嚟，同佢聯絡聯絡先！

熟人辦事 追進度No Problem！

　　Jenny聽「路邊社」消息話，呢位新食衛局政助，其實係陳肇始局長喺港大任教時嘅舊生，亦都同過副局長徐德義喺醫管局一齊共事添！咁睇嚟三位咁熟，鄭生應該一嚟就上到手，唔使點磨合喇，即使遲過其他政助上工可以追返進度！