31/10/2017
政府又賣廣告招人,司長少女心Unlock!
政府今日又出廣告喇!為嘅就係幫5個委員會招人(禁毒常務委員會;創新、科技及再工業化委員會;公民教育委員會;環境運動委員會;青年發展委員會),合共有11個名額,想邀請18至35歲嘅年輕人,透過「青年委員自薦試行計劃」加入呢啲委員會!但Jenny嘅重點就落喺條宣傳片入面......
半版廣告為5個委員會招人。
宣傳片重點在手勢
既然對象係18至35歲嘅後生仔,淨係登報紙又點夠呢!所以民政事務局就請咗政務司司長張建宗同埋Package Lau劉鳴煒齊齊拍咗條宣傳片。條片個重點本應就係個計劃同埋呢5個委員會嘅,點知睇到一半,Jenny同班朋友個重點即刻錯晒……(慎入!內含衝擊影像)
就係呢個動作!!今年韓星之間最流行嘅手勢,竟然由司長同Package Lau齊齊擺出來?!仲配埋「在我心裡,收藏」字幕?!
右邊嗰位就係朴志訓喇!而家都幾紅㗎!
在我心裡收藏,Hit爆日韓
呢個手勢叫「在我心裡,收藏」喺韓國2017年上半年度的手勢票選結果冠軍!韓文為「내 마음 속에 저장」源自韓國選秀節目《PRODUCE 101》的朴志訓在自我介紹時的這個動作。流行到一個點,就係連韓國嘅政治家同市民見面、影大合照嗰陣都會擺返個。
Jenny見到張司長同Package Lau齊齊「出招」,除咗即刻「吓」咗出聲之外,當然要快快手開心Share畀身邊嘅朋友睇啦!有熟悉日本動漫嘅朋友即刻就話:「呢個唔係《守護甜心》個女主角變身動作咩?」一講起Jenny都有啲印象,仲記得個女主角做呢個手勢嘅同時仲有句咒語,叫「我的心靈,Unlock!」
女主角變身時會做呢個動作再加「我的心靈,Unlock!」對白。
Oh My God!估唔到司長去到咁上下年紀都仲有一顆少女心!定係司長深知而家啲後生仔熱愛日韓文化,所以用呢種咁破格嘅方式融入年輕圈子呢?但係無論係邊個原因都好,Jenny都覺得呢個不失為一個新嘗試,只係對小妹來講衝擊實在太大喇!如果冇咩特別嘢,都係出返去煲返幾套韓劇平伏吓先!
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
《說說心理話》【奧運劍擊熱】大師兄張小倫親身分享!贏在起跑線=壓力?如何培育子女有卓越成就?► 即睇