其實同學校一樣，老闆等於校長、經理等於老師、小薯等於學生、公司制度就緊係等於校規啦，相信大家細個都一定用19字真言評論過校規有幾無理！但原來大個左，出到嚟社會做嘢，每間公司都會有其無理、冷血嘅「校規」！規矩有幾「騎呢」我就留番下次再講，今次想講嘅係，平時我地香港人為咗份工忍辱負重，默默接受傻仔規則嘅壓迫，但外國人只要講一句說話，senior management就即刻為佢改變制度，甚至打破禁忌，批准一啲從來唔合乎規則嘅事。

　　公司有幾多奇怪規矩去迫害小薯，相信講十世都仲有得講，但當中亦有啲基本及合理嘅規則。例如返工禁止飲酒是常識吧！飲醉酒做錯事，累公司蝕錢，邊個負責？滿身酒氣出去見客，真係多多錢都補唔返個first impression！所以由細到大，大家都有concept -「做嘢唔可以飲酒」！但係最近公司嚟咗個鬼妹新同事，大概中層左右位置，見到咁本地化嘅規矩，好chill咁講左個提議，成個制度就崩壞咗！ 

　　以下為英譯中對話: 

　　「我覺得開會應該要有酒精相伴！大家都係來自唔同agency，應該要有agency嘅習慣！」 

　　「但高層唔批准你係公司範圍飲酒架！」 

　　「邊個理佢啲Policy，等我同GM講！冇酒個人點relax？唔relax點諗到好絕世好橋？」 

　　正當所有人都當佢亂嗡，全世界認為就算你提出左，senior management又點會理你之際，高層真係approve左⋯當然，膠層要求呢啲飲酒會議只可於臨收工時間開，而且仲compulsory 要相關同事定期開會，擺明迫你要諗到顯著又爆嘅idea出黎。

　　其實對於打工仔嚟講，迫唔迫佢地諗橋都係其次，因為平時都畀人迫慣。但最在意嘅係，點解一啲無可能嘅要求，由一個外籍同事把口提出，就咁容易批；但當本地同事提出一啲好低微嘅要求時，管理層就會頭也不回咁拒絕。點解外國同事總係值錢啲、講嘢可以大聲啲？就連一個咁無理嘅要求，管理層都可以同意。一件咁簡單嘅事，就顯示出公司文化究竟有幾祟洋，你話一眾本地員工又點會對公司有歸屬感？件事最終發展成點？大家緊係「圍威喂」飲酒扮開會，睇落好似好開心，但始終大家心入面都有條刺。