打工仔身患重病，人人都知！而散播病菌嘅一定係公司老闆！但係原來辦公室入邊，有另一種病，係除咗打工仔必患疾病之外，連管理層、甚至老闆，通通都患上呢種病！即刻睇吓以下例子，望吓自己中毒有幾深啦！ 

例子一：日常生活，拖！ 

　　呢度提到嘅日常生活，梗係唔係指放工後嘅生活啦！打工仔又點會有放工呢？日常生活係指，辦公時間內，打工仔都要生存㗎，佢哋明明必須要做「維持生命」嘅事，都會一拖再拖！例如之前提過，打工仔想去洗手間？忍多陣，開埋個會先啦！水杯無水，要去pantry斟水？口渴一陣唔會死嘅，做埋呢份proposal先啦！Lunch hour要食飯啊？其實，今日個早餐食得好飽，都係等埋夜晚果餐，一次過食啦！有無發覺，種種為咗生存而必需做嘅生理活動，你都曾經試過為咗份工，一拖再拖、一忍再忍？ 

例子二：工作事務，拖！ 

　　嘩！邊個打工仔咁「把炮」，連人生大事—做嘢都可以拖？其實諗深一層，可能你都係「拖工高手」！有冇試過手上同時有多樣嘢要做，但係就硬係有某幾樣工作次次都唔願意開工，直至拖無可拖，迫於無奈先開始動工。當然你可以話：梗係做咗啲urgent嘢先，唔急嘅慢慢做都未遲！係嘅，但你又有冇試過，就算deadline前完成工作， 都唔會立刻將成品上繳中央，永遠都係last minute先send出去！其實，我都明嘅！做得咁快，大把時間剩，上司睇完你嘅傑作，咪又係彈返轉頭要你改，務求將你嘅野fine tune再fine tune，直至無時間比佢再改，先「將就吓」收你份唔完美嘅proposal。講真，反正改幾多轉，係你心目中都係唔完美，咁我不如deadline前先交，等你冇時間改，自己又可以做少啲嘢。

例子三：上司權利，終極拖 

　　打工仔有得拖，做上司嘅梗係都有得拖！不過，上司派功夫從來唔需要拖，只要一諗到有野要做，眼尾再望到邊個人形生物，唔洗半秒考慮，即刻點你做野！但係上司永遠好鍾意拖打工仔嘅微小要求！最簡單例如放假要求，早早填好form，鼓起勇氣行入manager房「求假」，上司永遠只會冷冷丟下一句：「我安排吓先」，就完全冇咗回事！要知道，休息是為了行更長遠的路。相信九成打工仔放假都會去旅行，但如果遇著呢種「拖住唔批假嘅上司」，你千祈唔使旨意妄想可以搶平機票；甚至要做好心理準備，畀屋企人或朋友圍攻你拖住個期，搞到機票、酒店貴哂添！最尾，做細嘅打工仔唯有再次鼓起勇氣，戰戰兢兢咁走入manager房，再三請假！所以話，九成打工仔患病？其實我身邊所有同事都身患重病！