出嚟做嘢最緊要人際關係好。人際關係好，打工生涯都覺得開心啲；人際關係好，做起事上來合作就更能事半功倍。不過，我發現愈來愈多上司喜歡那種獨來獨往，無情人、無家庭生活、無朋友、無社交生活的獨孤員工。不過有時這種員工，卻令到有自己生活的員工倍感壓力。 

　　公司有一同事，留有一頭清爽短髮，平常打扮和行為都比較男性化，我取其名Lily。憑外表你可能會以為Lily是一個女同性戀者，但其實她的興趣比普通女生更少女、更鹹濕，就是人稱「BL」的男男相戀內容，都鐘意睇。因為Lily的興趣比較偏，在公司難以和其他OL打成一片。久而久之，成為了一個不太受同事歡迎的人。 

　　Lily有一個習慣， 就是就算收工時間已到，都仍喜歡留在Office。甚至乎有一次，上司似乎有急事需要找office的文件，周末期間「撞手神」在WhatsApp Group問一句：「有沒有人在公司」，大家都心諗「啋你都傻，星期六仲同你返公司？」 不過，不出所料，Lily同事就如救世主一樣，在Group中發出神一樣的聲音，指自己在公司，替上司解決了燃眉之急。那時大家才知道，原來Lily情況比想像更嚴重，除了收工不願走之外，連放假時間都喜歡回公司。有一次，我忍不住問她： 

　　「其實點解你收工唔走？放假又突登返公司？」 

　　「喺屋企都冇嘢做，都係上網睇劇架啦。而且公司又有冷氣、水機、零食，我留係公司仲舒服過喺屋企啦，屋企又多人又嘈又迫。仲有啊，我媽見到我睇《上癮》，又會煩住哂架啦！我返公司好過！」 

　　不過，問題來了，上司看到Lily少和同事交談或嬉戲，認為Lily工作十分認真，和一般玩「辦公室政治」的八婆不同。而且Lily喜歡留在公司，連周末都在公司Standby，真是一個非常抵得諗的員工，不計較在公司OT。更因為恰好為上司解決問題，無人追究周末時她因私事所用的公司資源。

　　本來你要欣賞她、讚她都沒甚麼問題，但上司開會時公開稱讚肯OT、做事又專心的Lily，令我們一班做哂嘢，準時走的人好像偷走一樣。大家是否要如Lily一樣，把自己的空餘時間都留給公司，才是對公司盡心盡力？而且工作時應該如小學生一樣，不應和隔離位同事聊天，這樣工作才有質素？

　　Lily帶她的興趣回公司Standby值得嘉許，那我的興趣是和男朋友拍拖，我帶男朋友回公司又是否值得嘉許？根本，上司要的，是一個可以隨傳隨到冇自己生活的奴隸！