美國大選日（３日）就剛剛過去啦，而家就仲點緊票，就咁睇都好似叮噹馬頭咁，好緊張呢！。美國人選總統好似成為全球熱話咁，但其實大家又對美國歷屆總統有幾多認識？今日我哋就同大家嚟溫故知新，睇吓歷屆總統有咩金句，等大家漲下知識！

（Shutterstock圖片)

元祖級－喬治．華盛頓

 （Shutterstock圖片)

　　作為美國第一位元祖級總統，華盛頓係美國獨立戰爭中率領大陸軍團取得勝利，並令美國成功獨立，所以被稱為美國「國父」。大家細個都應該有學過「櫻桃樹的故事」，反映出華盛頓份人勇於承認錯誤，而華盛頓對於承諾、擔當、禮儀睇得好重，所以佢年紀輕輕時候，已經係法國耶穌會嘅規條入面，手抄出110條文明規則，後世人幫佢呢110條規則出書，名為《George Washington's Rules of Civility and Decent Behavior in Company and Conversation》，有一句係大家都成日拎嚟引用：

　　「不要應承你完成不了的事情，但一定要信守諾言。」

"Undertake not what you cannot Perform but be Careful to keep your Promise."　

　　信守承諾真係好緊要，做人有口齒，先可以立身於世，所以當年先有咁多人跟住華盛頓，加上佢又有領導才能，所以佢先成為歷史上唯一一個獲得全部的選舉人票嘅總統，真係眾望所歸囉！

中古級－西奧多·羅斯福

 （網上圖片）

　　有「老羅斯福」之稱嘅西奧多．羅斯福，係美國第26任總統，由於佢當年只有42歲就做到總統，所以不論眼光定個性都有自己一套睇法，更成功調停日俄戰爭，係1906年仲拎埋諾貝爾和平獎，成為第一個拎呢個獎嘅美國人。

　　老羅斯福細個簡直就係「學霸」，歷史、生物、德語、法語都係強項，而且喜歡閱讀，記憶力驚人，因為佢奉行一套策略：

　　「玩耍的時候，盡情玩耍；工作的時候，不要兒戲。」

"When you play, play hard; when you work, don't play at all."

　　呢套理論都應用係香港人身上，唔係你睇蘭桂坊一放工點解咁多人呢？不過工作努力，都係想令玩樂高興，好應該啊！

首個非裔總統－巴拉克．奧巴馬

 （Shutterstock圖片)

　　奧巴馬係美國第４４任總統，亦都係首個非裔血統總統，當年佢成功當選時候，成為「美國夢」佳話，因為就算係少數族裔，只要肯努力都可以成為美國總統，而奧巴馬更係以60%民意支持下結束任期，反映佢幾咁受人愛戴！

　　奧巴馬上任之後，首要面對個燙手山芋就係美國次按危機，正正就係因為進行經濟計劃、醫療及教育改革，先帶領美國走出陰霾，從而睇得出佢永不放棄精神，佢曾經話過：

　　「不要讓失敗定義你，失敗是用來教導你。」

"You can't let your failures define you. You have to let your failures teach you."

　　中國人都話「失敗乃成功之母」，因為要從失敗學習經驗，令佢走向成功道路，2009諾貝爾和平獎更頒畀奧巴馬，以表揚佢提出「無核世界」的努力工作。毅力都唔怕輸，先係成功人生的元素呢！

撰文：李皆穎