再過兩天就係端午節。每年端午節前幾天，我都會準備包糭材料：包括有糯米、開邊綠豆、豬肉、鹹蛋黃、糉葉等等。包前還要早一晚浸發材料及醃製豬肉，準備功夫都好多，包完又要蒸1小時才完成。但若果本身有筋骨扭傷的朋友，如果食左有糯米成份的食物，即時舊患復發。有見及此，今次就改用西米去做水晶糭，好讓大家都有糭過節，又可以安心品嚐。

　　材料及做法簡單，餡料又可以按喜好調配，大家不妨包幾隻齊齊來應節啦 ！ 

製作時間： 30分鐘

份量： 4條

材料：

西米       240克

紫心番薯    80克

粽葉        8 塊

棉繩        1圈

西米調味：

菜油    20克

砂糖    30克

清水    180 克

紫薯調味：煉奶    2茶匙

做法：

1. 西米加入油及砂糖拌勻，然後慢慢加入清水拌勻，浸15分鐘。

2. 紫薯去皮，切薄片，放入鑊內隔水蒸15分鐘至熟，取出壓爛，加入煉奶拌勻，備用。

3. 糭葉用熱水煮3分鐘及浸一會至軟身，盛起，抹乾，頭頂略修剪。

4. 取一片糭葉，在糭葉的三份一處摺起，摺成漏斗形狀，加入一小匙西米，然後放入適量餡料，面層再放一匙西米蓋住餡料，輕輕壓實。

6. 將糭葉上下覆蓋餡料，用棉繩或水草綁緊。

7. 鍋中加入清水煮沸，放入糭子，水要浸過糭面，用中火煮約30分鐘，熄火後再焗15分鐘，盛起瀝乾水份，放涼一會，即可食用。

小貼士： 

西米與清水拌勻時，要確保每粒西米都吸到水，蒸出來時西米才熟透。

如不是即日食用，可以放入雪櫃冷藏，食時蒸熱至軟身便可。