還有四天就係農曆新年，唔知大家除左要準備團年飯菜式之外，開年菜式又諗咗整乜未 ? 新年菜式多數取其意頭，發財好市少不了，但係食髮菜唔環保，而且未必買到正貨，反而蠔豉就一年四季都買到，不如就用佢來整一味簡單的賀年菜式。

　　今次韋太選用大隻金蠔去配搭煙鴨胸及乾瑤柱，係一味非常之惹味的菜式。大家快尐試下啦 !

材料:

　　蠔豉 8粒、煙鴨胸 2件、乾瑤柱 8粒、西生菜 墊底用 (隨意)

調味料:

　　蠔油 2湯匙、生抽 1茶匙、老抽 1/2湯匙、砂糖 1/2茶匙、紹酒 1茶匙、雞粉 1茶匙、浸瑤柱水 全部

粟粉水: 

　　粟粉 1/2茶匙、清水 半湯匙

做法:

　　1. 乾瑤柱用少許油半煎炸一會，盛起。用100毫升熱水浸4小時。

　　2. 蠔豉用滾水略沖洗，抹乾。

　　3. 煙鴨胸切成骨牌形，備用。

　　4. 用一圓形大碗，將瑤柱放中間，鴨胸和蠔豉梅花間竹地排，將調味料拌勻，淋入碗內，放入鑊內，用中慢火蒸燉45至60分鐘，倒出汁料。

　　5. 將汁料煮滾，加入少許粟粉水，將汁液煮至稠身，淋在菜式上，即成。