成世人流流長，槽，總要跳過幾次。閃前散個靚水是學問，亦是藝術。早年有極品港女隨餅附送紅色炸彈，同事難免口黑面黑。打工仔劈炮史中可以列出10萬個點解要派餅的原因，但有些事情不做，都總會有個理由的。

散水唔派餅6原因：

1. 「我又唔係做咗好耐……」

　　對於一眾「短命仔」而言（即part time、intern、試用期都未過之人），其實唔派餅又好難怪。試諗諗，只賺幾個月人工，車費飯錢唔再講，若公司上上下下為數不少，分分鐘要倒貼份糧。

2. 「我對呢家公司無乜感情」

　　「無感情」3隻字一拋出，的確無得輸。姑勿論人事關係、份工問題，還是一心想跳槽而令到自己無心戀戰。一句到尾，感情呢家野，只有自己先最清楚。

3. 「其實我只係一個小薯仔」

　　辦公室每事每物都講階級，就連散水餅亦唔例外。有人視派餅為一種比賽，但有更多打工薯仔認為，花一筆錢去餵班「sydney mouse」同事（編按：識你老鼠），同扣自己人工無分別囉！

4. 「人做我做無啲style」

　　雖說派餅是不少打工仔的「閃前」動作，唯散水風格因人而異。餅，笨唔係唯一出路。閣下即管放膽去突破派餅傳統，發揮創意去發掘屬於自己的獨特散水禮。

5. 「過咗last day都唔會再見啦~」

　　話明last day，一般都後會無期。所謂「過咗海就係神仙」，就算事後俾人唱，都無須再有顧忌。更何況，「好嚟好去」未必一定要靠件餅嘅....

6. 「請同唔請無分別」

　　人走茶涼，sad but true。身處「食餅仲多過食鹽」的職場，那年那日你請過我食的一件餅，不用說是甚麼口味，甚至連「請」呢個動作，恐怕都已經忘記得一乾二淨。

source:CTgoodjobs