19/10/2016
【伏味濃】令你OT的5個誘因
香港人工時長係人都知,日做夜做無時停。對於OT一事,打工仔由無奈、埋怨,最後更變成習以為常。但有無諗過,有時候OT可能係自己攞嚟。你又曾經出現過以下邊個念頭搞到自己要OT?
1/ 份嘢差少少就搞掂
「差少少」大部分情況都只係一種錯覺,當你做落去,就可能發現呢part少咁個point,嗰part又差份supporting,最後所有部分加加埋埋,執下砌下又改下,分分鐘OT時間仲多過食飯時間。
2/ 等人食飯hea時間
收工同fd子聚舊,放鬆下飲杯嘢無可厚非。但如果飯局約喺8點打後,時間就勁老尷。於是有人會選擇利用中間嘅空檔繼續OT,但求清得一樣得一樣。之不過,其實hea時間嘅方法有好多種,既然收得工就不妨去行下街開心下。
3/ 啲嘢唔係urgent就係ad-hoc
十萬條deadline要趕,所有嘢都係urgent,呢兩日就要交貨。如果一次半次,可以體諒。但若然所有嘢都係最後一秒先落order,OT變成常態,就完全唔關個人能力事,而係公司文化或你老細嘅問題(記住要反映下)。
4/ 堅信「長留公司有好印象」
借問聲,你又有無聽過「工作效率低嘅人先要OT」?凡事兩面睇,唔排除有老細鍾意員工留到最尾一刻stand by。放工後留喺公司,有人會覺得你好搏殺,亦有人會認為你做嘢慢,或者喺公司做私人嘢等。
5/ 老細走你先走
呢種係早年積存嘅辦公文化,「怕老細有嘢要交低」、「怕佢見到我走唔happy」,但準時收工係打工仔嘅權利,只要趕得上進度,大方嘅老細會懂的。
Source: ctgoodjobs.hk
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】烏軍攻入俄國庫爾斯克州近兩周,並炸毀兩座重要橋樑,你認為俄烏戰爭會否急劇惡化?► 立即投票