Facebook過去一周，幾乎成為朱古力棒Snickers，和衍生產品「抽水器Sinckers」天下。唐英年、陳豪等政壇娛圈名人，失言金句被品牌轉化成「肚餓語錄」，廣告出街後迅速在網絡洗版；網民大讚緊貼民情，緊接將廣告二次創作，製作成一張張令人會心微笑的改圖，為處於政治低氣壓的香港，送來一抹甜絲絲的幽默。

　　廣告幕後創作人周威廉（William）和吳緯綸（Teri），捉緊社會潮流想出絕蹺。二人解構平日在工作室絞盡腦汁創作，度蹺成功的最大關鍵，是能否兩秒內吸引觀眾︰「香港人可能只係得2秒（睇廣告），諗Idea要再直接點。」

　　廣告人都渴望有代表作，能深深打進觀眾心中，入行僅3年的Teri也不例外，有份創作的作品大獲好評，他滿足地形容：「點講呢？諗到一個好廣告，之後幾日番工，你對住個電腦熒幕，會無端端識自己笑。」坐在旁邊的好拍檔William，在行內4A公司工作逾10年，已是助理創作總監，亦笑著說：「這個是我自己好鍾意的作品，有期望。其實廣告可以帶到咩程度的Viral effect（病毒效果），係預料唔到，好多時你以為出街後效果會好勁，但最後未必是那回事。」

香港都市人 得2秒空檔

　　從事創作，很多時候等靈感講感覺，以為想到好蹺，但市場反應往往有很大落差，William也遇過失落時刻。影帝劉青雲有摣太空船的太太郭藹明，幫他抽離角色，William女友亦能帶他回到地球表面︰「有時諗到條蹺，會自我陶醉在自己世界，覺得『正啊喂！』，但同她講完無反應，話唔會Care，就知要再度過，消費者可能好似佢咁未必會鍾意。」

　　William創作度蹺時，標準之一是測試廣告能否在2秒內吸引觀眾，尤其是港人生活節奏急速，停下來留意廣告的時間，可能只得一瞬間︰「內地、台北地鐵廣告，可以有好多文字，大家慢慢去睇，但香港不是。其他城市的人給5秒，香港人可能只得2秒（睇廣告），諗Idea要再直接點，一定要兩秒搞掂。」

線下到線上 社交網發酵

　　名人耳熟能詳的金句，是港人難忘的共同回憶。市民在地鐵站、巴士站候車時見到，都不再低頭，拍照分享至社交網站。William認為平面廣告最理想，是做到「線下到線上」（Offline-to-Online）效果，消費者會主動分享（Share），令廣告走入社交媒體。Teri拿著手上的電話說︰「個Trend（潮流）在社交媒體，大部分觀眾係用手機、電腦上網接收資訊，宜家電視都係邊玩住電話邊『聽』，唔係睇了。」

　　在現在的社會氣氛，用抽水方式法炮製廣告，看似最易在消費者心中留痕。本身很關心社會議題的William認為，趨勢很快又會改變：「政治不會永遠都是Hot topic，可以用來做廣告，尤其是香港人好善忘。一個Campaign突然之間好紅，但過多一個星期，再同人講就（火羅）。」Teri補充說廣告何時都要和社會聯繫，才可發揮能量：「我們都是普通香港市民，諗廣告會留意番大家平日見到、講過的事，只是用聯想力將它們變成一個Idea……。我們不是用廣告講自己，而是潮流、觀眾興趣，去Deliver message（表達產品信息）。」 

每週一蹺：

創蹺人：周威廉（William）、吳緯綸（Teri）

創蹺時間：2015年5月

致勝關鍵：

　　●採用公眾熟悉的名人金句，吸引注意

　　●廣告概念緊扣產品「肚餓會犯錯」信息

成效：

　　●產品平面廣告在社交網站獲廣泛分享

　　●網民自行設計抽水器程式「Sinckers」，宣傳效果倍增

　　●Snickers公開稱滿意廣告效果