民主黨今個月19號就會舉行黨慶暨籌款晚宴，今日就先開個記者會簡介下有乜搞作。籌委會主席袁海文就話，今年轉咗場去將軍澳搞，地方比之前大咗，可以加開至60席，而家已經賣出咗40席，不過籌款目標就冇變過，一樣係400萬。

ByeBye「#大和解」

　　Jenny記得，上年係特首林鄭月娥就任後第一個民主黨黨慶，可能因為仲係蜜月期，林鄭為咗證明佢可以改善到行政立法關係，除咗應邀出席之餘仲留低食飯，席間仲破天荒捐咗3萬蚊贊助李華明（阿Fred）唱歌添吖！不過今年就冇呢支歌仔唱喇，事關民主黨今年係唔會請林鄭同埋鄭若驊，睇嚟「#大和解」事件唔會再發生嚕！

　　雖然唔請林鄭同鄭若驊，Jenny聽聞，其他官員出唔出席就可以自行決定，唔會好似以前梁振英年代咁勒令大家都唔准去，所以今年另外兩位司長張建宗同埋陳茂波（波叔）都應邀出席餐前酒會，而其他政策局除咗商經局未覆之外，都會有官員出席嘅。

Fans唔在場 阿Fred都唔唱

　　之但係問到有咩節目娛賓，民主黨副主席羅健熙就大賣關子，話仲同大家傾緊喎，乜表演都好啦，冇咗林鄭喺度，花生都少幾斤！至於阿Fred因為籌委會決定唔請林鄭，所以都決定「唔DO」籌委會成員，咁對籌款數字有冇影響先？羅健熙就直認「唔擔心就假喇！」，事關阿Fred係最吸金嘅成員之一嚟㗎嘛！計Jenny話，Fans（林鄭）都唔在場，唱嚟又有咩意思喎！Right？

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇】卓林普經優才計劃成為香港居民，桌總冀當局放寬16歲以下青少年進入桌球室限制助年輕人接觸桌球，你是否認同？► 立即投票