昂坪360推優惠有得睇冇得使 又爆「關公災難」

　　昂坪360噚日（5日）宣布推出「港人感恩月」優惠，將每年嘅3月同6月定為「港人感恩月」，而今年凡係身份證上有「3」、「6」、「0」其中兩個字嘅香港人，就可以喺3月同6月免費乘搭來回昂坪纜車標準車廂。咁筍？Jenny啱啱好夠資格噃！放假入去氹返轉、搭住纜車睇日落都好吖！

騙徒手法層出不窮……

　　正當Jenny興高采烈咁撳入去官網睇詳情嘅時候，突然就望到個網上方有一行醒目提示：「昂坪纜車於3月6日至26日暫停服務，以便進行維修保養。」What？Are you kidding me？以香港人咁勤力嘅性格，斷估都唔會特登請假去搭纜車啩！咁咪即係得返30號同埋31號呢個周末有得去？到時話唔定又整返個「逼爆昂坪」見報喇！

　　唔少合資格嘅網民都同小妹一樣發現端倪，紛紛去昂坪360個Facebook度留言投訴，大鬧「無心搞唔好搞啦！」、揶揄「下次大維修是否6月？」等，今鋪又爆「關公災難」喇！

「補鑊」延長優惠10日咁多

　　昂坪360都Feel到今次GG喇，急急腳「補鑊」，將3月嘅優惠延長到4月10日，今年6月就唔會有定期維修。之但係延長多10日，成個優惠期實際都係15日，比起一個月少咗整整一半；而6月就開始進入香港嘅颱風季節，到時大風吹兩吹話唔定又停駛喇！不過好彩呢個「港人感恩月」優惠係年年唔同，Jenny就希望下年昂坪360負責宣傳推廣嘅部門同工程部溝通好啲啦！唉！唔好再令大家一場歡喜一場空喇！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇