2019-03-11
李小龍絕密格鬥片流出?!至於你信不信?反正王國興信了!
工聯會嘅王國興(MC興)雖然上屆立法會選舉失利,但係都無損佢要做政壇KOL嘅理想!久唔久都會喺佢個社交網站乜都噏一餐。今日佢就發現新大陸,即刻同網民開心Share,點知……
來自蔡素玉的「珍貴片段」
是咁的,MC興今日喺Facebook出Post,皆因佢喜獲民建聯區議員兼人大代表蔡素玉分享一段「一輯非常珍貴的、一代宗師李小龍在擂台擊敗時為前韓國冠軍拳手的三個拳賽回合實錄」,令佢「大開眼界」,所以「謹轉發分享」畀大家睇啦!不過Jenny一望,唔係好對路噃!條片1080p㗎噃!片中嘅主角仲咁皮光肉滑嘅?乜李小龍穿越咗咩?唓!原來係打機片嚟嘅!一眾網友見到,都趁機留言指正加恥笑添!MC興此舉,都令Jenny「大開眼界」!
對家區諾軒緊係唔會放過大好機會,一於Cap 圖「鞭屍」。
打機片當真 刪Post都冇用
呢個Post短時間內引嚟咁多迴響,MC興都Feel到「領嘢」,急急刪Post兼且喺Whatsapp出返個「致歉通告」。不過急刪Post都冇用喇,正所謂「凡走過,必留痕」!Cap圖已經喺網上瘋傳喇!
其實身為區議員,嘢唔可以亂食,片都唔可以亂Share,誤導咗啲街坊就唔好啦!Jenny希望MC興只係喺Facebook Share就好喇,如果喺Whatsapp群組Share,一傳十、十傳百,咁就收唔返,成為咗假新聞嘅幫兇㗎喇!真係Too Bad喇!
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】教育局最新初中教材提出應堅拒婚前性行為,你認為教材內容是否不合時宜?► 立即投票