財爺派糖「減甜」被人怨 黃國健：「雞肋都係雞！」

　　財爺今日發布新一年嘅《財政預算案》，Jenny都好關心自己有冇So，錢就預咗冇得派，一心有「糖」食下都好，點知睇晒成份Budget……好失望囉！今次幾乎食白果呀！

 

 

　　退稅做開冇理由唔做，之不過上限就由3萬變咗2萬，Jenny呢啲年薪低過40萬嘅打工仔，就即刻跌出咗個派糖優惠群組；而差餉就一向唔關Jenny呢啲冇殼蝸牛事嘅，真係諗起都心傷啊！

 

長者醫療券加碼 小妹妹有免費針打

 

　　冇「糖」食唔緊要，小妹本身一心諗住可能醫療福利有我份呢－－但我還是太年輕了，醫療券加碼就只關長者事，點知免費HPV針又只限女學童……

 

　　睇返政府向醫管局撥款5億之後，今次《預算案》再撥7億經常性資助，Jenny就擔心會唔會好似上次咁，唔知去咗邊啦……

 

「雞肋都係雞」食咗先講？

 

　　喺教育方面，《預算案》會向有需要嘅學生派2500蚊，比上年多500蚊，都算係咁啦；另外喺中學推「一校兩社工」，都算對學生有少少幫助嘅。

 

　　不過其實好多今次嘅政策，例如20億「過渡性房屋基金」、6億翻新公廁等，都畀人批評「到喉唔到肺」，反而市民期盼嘅15年免費教育、租金管制等政策就隻字不提，唔知政府幾時可以回應Jenny呢啲小市民嘅訴求呢？定好似黃國健（KK）咁講：「雞肋都係雞，只係冇得啖啖肉」，食咗先講？

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】政府擬立法規定所有的士須於車內安裝攝錄設備，你是否認同？ ► 立即投票