今年預算案料響應「廁所革命」？市傳消息同你一文睇晒！

　　聽日就係新一份《財政預算案》公布嘅日子啦！Jenny同一眾行家都整裝待發，等聽日嘅來臨。

 

 

只得「微風」吹

 

　　照慣例，《財政預算案》公布前一兩個禮拜，政府就會不斷吹風，放咁啲重點消息出嚟睇吓市民嘅反應，但係今年吹極啲風都唔大，冇乜邊個消息係令人眼前一亮嘅，又或者可能因為財政司司長陳茂波（波叔）話今年盈餘少咗成三分二，大家都預咗冇得派錢（上年派嗰份都仲未拎到呀！）所以就冇乜期望？

 

「廁所革命」萬歲

 

　　不過計Jenny話，冇錢派唔代表冇好嘢嘅！小妹綜合咁多「風」，覺得最有趣嘅就莫過於拎5億出嚟翻新公廁喇！唔好睇小公廁嘅影響力吖！Jenny覺得呢個係一個城市最重要嘅指標，尤其是去旅行嗰時，人有三急時遇到個臭氣熏天嘅公廁，無論呢個地方有幾靚都已經扣晒分！而習大大早喺2015年就搞呢個「廁所革命」，香港係時候要跟上喇！

 

　　至於預算案其他措施，由於今年派錢機會甚微，波叔如果唔派返啲「糖」，就點都講唔過去！所以各大政黨都照舊叫波叔退稅、綜援同各類津貼「出雙糧」、公屋免租一個月等等，Jenny估波叔都應該唔會托手肘啩！仲有其他零零碎碎嘅消息， Jenny就特登整咗個表俾大家一眼睇晒！

 

表列其他措施消息：

 

為應屆文憑試考生繳交考試費；

向合乎資格的基層學生派2000元津貼；

增撥3億元於今年9月起在中學推行「一校兩社工」；

增撥6億元經常開支予醫管局，用作為前線醫護人員增加薪酬和津貼；

撥出50億，提升現有海濱長廊設施；

設立2億元基金，加強樹木護養及管理人員的培訓工作；

增撥每年以億元計的新資金予醫管局買藥，涵蓋罕見病藥物。

 

 

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇】陳美寶、羅淑佩分別被任命為運物局及文體旅局局長，你是否認同新任命有助香港鞏固物流樞紐地位及促進旅遊經濟？► 立即投票