2018-11-20
政府終出手平「黃牛之亂」 再見絕望座位表?
只要喺香港睇過演唱會,應該都曾經試過啃黃牛飛!就好似上次黃子華(子華神)喺紅館開嘅收山之作,有黃牛炒到成萬蚊!搞到連子華神都要開腔叫大家唔好幫襯黃牛,之後仲要辛苦自己加開足26場「抗黃牛」!身為子華神Fans嘅Jenny表示,睇唔到子華神收山之作嘅絕對係一輩子的痛!不過作為一個有質素嘅子華神Fans,就算撲唔到飛都堅決唔買黃牛!好彩Jenny人緣好,最後都有FD子請小妹睇!
但願從此同「絕望座位表」講Bye bye!
政府終於做嘢喇!
「黃牛之亂」講咗幾十年,政府終於有返啲意欲做嘢喇!今日民政事務局提交到立法會嘅文件就有提到,當局打算修訂《公眾娛樂場所條例》,將紅館同伊館在内嘅政府場地納入規管,日後炒賣呢啲場館嘅門票即屬刑事、又會考慮實施「實名制」、同埋逐步下調內部認購門票嘅比例等措施。Jenny心裡即彈出一句:
演出業協會好勞嘈
之但係,演出業協會就出聲,反對提高公開發售門票比例噃!佢哋話,業內一貫會安排約六成半門票公開預售或發售,贊助商、歌迷會啲飛都唔可以用嚟炒「黃牛」,所以要求Keep返現有安排,以便業界有彈性營運,同埋爭取贊助商支持,如果唔係就會嚴重影響文化產業生計喎!
最後會再見定「再見」?
不過睇返上年年尾嘅楊千嬅演唱會,網上就流傳出一張「絕望座位表」,原來因為嗰場有差唔多八成飛都係內部認購飛,只剩啲「雞肋位」用作公開發售,而現時內部認購上限係八成,雖然業界就話冇去到咁盡,但係「絕望座位表」就從來都唔係個別事件噃……
講到尾,Fans係驚冇飛睇、主辦方係驚冇贊助啫!除咗政府講嘅建議,計Jenny話,每個演出額外整返場全黑場(全部內部認購場)咪得囉!反正而家都係差唔多啫!Right?
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
《說說心理話》【奧運劍擊熱】大師兄張小倫親身分享!贏在起跑線=壓力?如何培育子女有卓越成就?► 即睇