2018-11-19
5個港人1個窮 有樓冇收入都係「貧友」
政府今日公布咗上年嘅貧窮人口數字,一如大家所料,貧窮人口又再次創新高,去到138萬人喇!貧窮率亦都去到20.1%,即係話每5﹒4個人入面就有1個「貧友」,真係好似便利店咁「梗有一個喺左近」!
人口老化+家庭結構細=「窮人」增加?
政府成日被人鬧「愈扶愈貧」,無計啦,年年個數字都係上升,好難唔令市民有呢個印象喎!不過今日政務司司長兼扶貧委員會主席張建宗(張宗)就話「唔係」!係因為人口老化同埋而家啲家庭結構愈嚟愈細有關嘅啫!嗱,人口老化聽就聽咗好幾年,以而家香港嘅人口結構嚟睇,應該都會繼續講落去,Jenny估計幾年後政府嘅講法都係唔會點變㗎啦!
「貧友」未必真係窮
張宗仲係咁重申,其實而家貧窮人口個計法,係會高估咗個數字,因為貧窮線係用收入嚟計,但係就冇計埋市民嘅資產同埋年紀,仲有福利嗰啲,所以例如有唔少長者都係有自置物業,但係冇收入,都會計入貧窮人口入面喎!Jenny喺個PC入面,都唔知聽咗張宗重申呢樣嘢幾多次!
既然呢個計法有咁多限制,何解政府又唔諗住改改佢呢?張宗就話因為扶貧委員會都驚改咗個計算方法,數字唔同咗,會令市民有個錯覺政府係為「篤數」而改喎,所以就喺開場前不厭其煩咁係咁提住「貧窮人口應該有高估㗎」、「貧窮人口唔一定有咁多㗎」咁囉!Jenny覺得,政府又要出數字,又要事後話返個數字唔夠準確,真係令人唔知畀咩反應好喇!
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【慎防受騙】偽冒《經濟通》投資群組頻現,切勿誤信騙徒,如有疑問,請循官方渠道查詢► 了解詳情