議員齊打流感針 克勤家輝扭擰誓守胸前兩點

　　冬季流感又嚟，大家打咗流感針未呢？今日立法會大會開會之前，食衛局局長陳肇始同埋副局長徐德義就嚟咗立法會，同一班議員打流感針！雖然唔係由局長同副局長親自操「針」，都一樣有廿幾三十個議員捧場！作為大主席嘅梁君彥梗要帶頭打針啦，佢話雖然議事規則冇規定議員一定要打流感針，不過大家都好踴躍參與噃！計Jenny話打針眾生相更加娛樂性十足！

 

主席打頭陣！

 

「怕針巴打」慢必陳恆鑌 盧偉國求關注

 

　　今年政府擴大到50歲以上嘅人士打流感針免費，連經民聯石禮謙都話：「唔駛錢實要打！」而適逢今年立會出現史上第一位任內懷孕嘅議員—新民黨容海恩（Eunice），Eunice一出現就成為全場焦點，大家仲特登拎塊宣傳孕婦打流感針嘅Board畀佢影相添！可能Eunice都知自己會成為主角，打緊針嗰陣一直保持燦爛笑容，塊面變都冇變過！連一樣打緊針嘅盧偉國都呷醋：「個個都影佢唔影我！」

 

準媽媽Eunice全程笑容滿面，唔講唔知佢打緊針。

 

　　不過相比起Eunice呢位唔怕打針嘅準媽媽，有啲男議員反而仲驚青噃！講緊嘅就係人民力量陳志全（慢必）同埋民建聯陳恆鑌喇！佢哋簡直就係「怕針二人組」，打針時個表情可以做返個表情包！娛樂性100分！

 

 

立會「怕針巴打」－慢必

立會「怕針巴打」－陳恆鑌

 

保護「點點」要小心 屏風是你好幫手

 

　　打針要拉高衫袖就係人都知，而立法會議員著住西裝，有啲議員都仲卷得起個衫袖，有啲就因爲西裝太緊，被護士姐姐勒令除衫！慢必、林卓廷、邵家輝同陸頌雄等都不能倖免！不過邵家輝一除咗......件外套就已經令大家笑到停唔到口，原來佢冇著「打底」，出現「凸點」！連何君堯都笑佢：「叫姑娘畀兩塊乳貼你啦」！不過Jenny同一眾行家最想知佢點樣喺咁多鏡頭面前打針呢？可惜邵家輝似乎怕醜，最後拿拿臨喺屏風後面打完，就急急腳咁走咗去喇！

 

　　有啲議員就姍姍來遲，好似民建聯陳克勤咁。佢一入嚟就見到陸頌雄除衫打針，指住佢嚟恥笑：「你係到做咩呀？」、「你做乜除到咁呀？」點知佢之後都因為件衫太緊，被陳局長勸佢除埋一份！原來局長你先係大魔王…Jenny就覺得克勤你唔使驚哦，try your best to show your breast 啦！（最後佢都係匿入屏風打針）

 

　　
而何俊賢就同局長建議，不如政府整返件「打針推廣背心」，等佢哋打針時著，佢仲寫埋包單，「$100一件都有人買呀」！局長可以諗諗佢喎！

 

慢必要除衫打針，仲慘被攝得「凸點」！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

想要獨家投資理財Tips？即Like etnet 全新Facebook專頁► 立即讚好