仲有一個星期，就係立法會九龍西補選嘅時候喇！「嬲」字格局定左，唔知係唔係今次淨係補選一區，選舉氣氛似乎就冇３月嗰陣咁濃厚，不過話晒民主派有李卓人（阿人）同馮檢基（基哥）內訌，Jenny覺得呢啲花生唔怕食呀！

齊齊發動Video攻勢 獨基哥要放Link

　　Jenny發現今次有啲候選人都好鍾意拍片宣傳，就好似李卓人噚日先出咗條新片，講反對填海，個風格仲幾迎合年輕人口味；而做開傳媒嘅陳凱欣直情係「一日幾片」咁滯，不過啲片嘅形式就離唔開「曬馬」，一日孖一個建制議員，講點解支持佢出選，而政綱嗰類就以圖片形式出Post；至於基哥嗰邊就少啲片睇，而佢終於喺今日凌晨擺咗條短片上Facebook，不過……點解係條Google Drive link嚟嘅？要撳入去先睇得，冇得自動Play噃！睇嚟基哥似乎唔太識用Facebook up片噃，不過唔緊要！工聯會有開Facebook班呀，基哥！

Great Again？ 入唔返議會仲驚！

 　　話時話，基哥今次個競選口號係「Great Again」，大家係唔係覺得好熟口面呢！咪就係之前Donald Trump（侵侵）選美國總統嗰句「Make America Great Again」而嚟嘅囉！基哥都一早認咗Idea來自侵侵。不過Jenny就覺得，呢個「Great Again」願望，除咗係講香港，仲係講緊基哥自己入唔入得返議會Again喇！睇而家個勢，小妹係基哥的話，就真係有少少驚喇！

　　九龍西補選候選人仲有伍廸希、曾麗文。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】美國總統大選在即，你認為誰將最終當選？► 立即投票