《經濟不停學》荷蘭式拍賣可對付黃牛？關鍵在於數量！

　　早前網上媒體「試當真」舉行活動，並以「降價式售票」惹來網絡熱話，有網民形容「試當真」呢次行動係黃牛與粉絲嘅一次對抗！而呢種售票方式，有人認為係屬於「荷蘭式拍賣」，究竟呢種方式係咪真係完全對付到黃牛呢？其實關鍵在於售票數量，而原理同股票概念有相同地方㗎！

 

 

荷蘭式拍賣係因為鬱金香擺唔耐？

 

（Shutterstock圖片)

　　所謂「荷蘭式拍賣」其實真係同荷蘭有關，因為荷蘭著名出產鬱金香，而過往呢種花嘅儲存方式係擺唔耐，所以就必須係收割後一日內賣清，因此花商就會以「降價式」拍賣出售。例如早上七點，花係剛剛採集，正價100蚊一朵開始拍賣，價高者得；剩低嘅存貨，兩個鐘頭後開始降價，並由90蚊一朵開始拍賣，如此類推，直到存貨售罄為止。

　　情況其實有啲似超市晚上9點後，正價食品改為特價食品咁，目的都係希望商家盡量可以將手上嘅庫存短時間內盡量沽清，不過超市並非以拍賣方式，而係劃一售價。另外，股票市場都曾經出現過一種「荷蘭式拍賣回購」，即公司確立回購價格範圍、計劃回購數量，然後股東選擇價格範圍內某一特定價格投標，公司彙集所有有效投保的數量和價格，根據計劃回購量確立最低回購價格。　　

 

試當真降價式出售，真係對付到黃牛？

 

(試當真Facebook圖片)

　　大家如果有留意的話，「試當真」呢次活動由1萬蚊開始起標，隨後每日降價至5000蚊、2000蚊、1000蚊、800蚊，最後最低價格係降到10蚊。不過，係800蚊時候，所有門票已經售罄，大家不禁疑問，呢種方法真係會對付到黃牛炒賣咩？其實關鍵在於數量及供求問題！

　　其實呢次活動售票數量並唔多，大概只有幾千張門票，但心水清嘅朋友都知，以「試當真」嘅名聲，要全數售罄問題不大，關鍵在於有買家未必識為門票「定價」，以至有觀眾想買，但又未到心水價格，而普遍門票都係1000蚊就出售大半，所以1000蚊就係市場認為「最合適」嘅市場定價啦！

　　至於無飛又想睇嘅觀眾，想入場睇嘅話，唯一方法就係用高於800蚊嘅「溢價」向有票人士收購，事實上係唔同二手買賣平台，都依然見到有活動相關嘅門票出售，定價係900至2000蚊不等。說到底，黃牛問題依然未見有太大改善，而降價式出售更令到二手市場價格混亂，因為只要市場需求大過供給，不論官方使用邊一種發售票價方式，都一定惹來黃牛炒飛，同股票市場無異。

 

杜絕黃牛方法：實明制或使用電子門票

 

（Shutterstock圖片)

　　其實大家都係想睇到偶像嘅演唱會或者演出，但又唔想食黃牛炒價，而售票網永遠都唔會塞得入，塞到入去又剩返單丁座位，售票熱線更永遠打唔通，相信以上都係大家搶飛嘅共同經驗。最有效可以阻止黃牛入場，一係就大量供應座位，一係就用系統性手段方式門票轉讓。

　　最常見方法，就係民間一路都提倡好耐嘅「門票實名制」啦！即係門票連同身分證一齊入場，又或者一張身分證限購兩張門票，相信都有效阻止黃牛問題，不過大家反而會擔心個人私隱會唔會外洩。

　　另一個方法，就係用「電子門票」方式入場啦！因為而家手機嘅錢包都可以放電子機票、信用卡、八達通、電子會員卡都得，當然電子門票都可以啦！而且「嘟」個QR Code就可以入場，又可以減省檢查人手，加上呢種電子錢包本來就因為安全問題，無辦法卡過卡、票過票咁轉移去第二步手機，哪怕你買十張飛都轉售唔到，可能比起實名制更有效！

　　不過，方法還方法，官方有無心想堵截問題就第二個講法啦！係商家心目中，可以做到「一飛難求」嘅宣傳效果，何了而不為呢？賣晒啲飛，咁咪可以走先啦，係咁先啦，下次再玩啦！

 

撰文：李皆穎

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇】港府本年度已錄逾2千億元赤字，有議員指或難符基本法力求收支平衡之規定。你認為當局應如何解決財政問題？► 立即投票