《經濟不停學》揀錯代言人可以好大劑，邊三間公司股價畀明星搞到跣腳？

 　　揀股票投資要睇財報、資金流、行業大環境，真係幾麻煩下。點知呢個網絡時代，連代言人都要關注埋，如果唔「帶眼識人」，唔單止公司聲籲受損，連股價都會跌埋一份。以下就盤點三間畀代言人拖累股價嘅公司，啲故仔幾精彩㗎。

 

蒙牛瀨過三次嘢，眼光離奇地差？

 

　　印象中，港股入面要數蒙牛（02319）瀨嘢瀨得最多，係就係有宣傳效果，不過係負面嗰隻囉！2018年FIFA世界盃蒙牛係贊助商，仲請咗阿根廷球星美斯做代言人，點知喺世界盃分組賽頭兩場，美斯一球都入唔到呀。唔少網民揶揄美斯「飲蒙牛，無入球」，網上改圖改歌詞出晒嚟，最慘嘅喺有其他品牌贊助嘅哈利卡尼同C朗拿度，分別喺當時嘅世界盃頭兩場入到5球同4球，相較之下美斯嘅表現真係令蒙牛相當瘀皮。喺美斯踢完頭兩場之後嘅交易日，股價分別跌咗2﹒62％同升1﹒11％。

 

 

蒙牛旗下優益C三年前嘅宣傳post，可惜美斯喺FIFA世界盃頭兩場並冇咁意氣風發。（優益C　Facebook專頁截圖）

 

　　中國男星肖戰2019年9月開始做蒙牛旗下真果粒品牌嘅代言人，雖然對業績係有幫助，但係肖戰倦入舊年嘅227事件中（簡單嚟講肖戰有fan不滿有人喺同人平台寫關於肖戰嘅故仔，report到人哋個平台要翻牆先有得睇，引起大批人不滿，喺同年2月27號洗番肖戰版），喺事發嗰一個星期，股價累挫逾5﹒5％。

 

　　最後一單喺上年4月22日羅志祥成為蒙牛旗下酸奶品牌純甄代言人，點知第二日女友周揚青就爆料，羅志祥有多個性伴侶，遭網友發起罷飲純甄，事件發酵後蒙牛股價先跌後回穩。

 

央視插口鄭爽代孕事件，Prada慘受累

 

（鄭爽微吧微博專頁圖片）

 

　　喺中國追星同喺其他國家嘅唔同之處，就係中國政府隨時可以出嚟講兩句。女星鄭爽同男友喺美國搵代孕，但居然喺孕母陀B期間，兩個人分咗手。最後得前男友留喺美國照顧兩個BB，並喺微博公開呢件事，之後一段男女雙方家庭嘅錄音流傳，女方家庭棄養嬰兒嘅態度引發激烈批評。因為代孕喺中國係犯法，鄭爽牽涉其中已引發爭議，搞到連官媒央視都出文，話代孕喺中國被明令禁止，「其對生命嘅漠視令人髮指」。

 

　　好衰唔衰，Prada喺呢件事爆出前一個星期，啱啱先宣布咗鄭爽做中國區代言人，喺今年1月18號尾市，普拉達（01913）股價一度跌過3%，收市跌1.7%。

 

C朗提球迷多喝水，一個動作令可樂市值失40億美金

 

　　最新一單當然要數葡萄牙球星C朗拿度喺歐國盃賽前記者會度，將可口可樂移到無雷公咁遠，鏡頭都影唔到，再遞高支水，用身體語言嚟同球迷講要多喝水。佢一個動作，當日可口可樂嘅股價立即下降，跌幅最多約1.6%，市值蒸發近40億美金。

 

　　今屆歐國盃賽事總監後尾話，一旦有球員再做出相同舉動，唔排除罰款呀！

 

　　事實上，好多大牌子例如Youtube同蘋果，依家都唔會用代言人宣傳，因為佢哋已經唔需要透過代言人嚟谷人氣，廣告嘅目的係提醒消費者唔好唔記得自己個品牌。上述蒙牛、普拉達同可口可樂三間公司都已經達到一定市場佔有率，可以參考下呢個做法。

 

撰文：吳藹林

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》 消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇