《經濟不停學》新手點睇業績報告？三招小技巧令你快速上手！

　　新手炒股除咗要識圖表分析之外，仲要留意業績報告表公布，不過無學過會計或者金融知識，就會好似睇緊外星符號咁，完全唔知佢講緊乜。唔使怕，今集經濟不停學就幫大家歸納下睇財報有乜新手小技巧要留意，特別係唔同行業嘅財報，要留意嘅數據都唔一樣，第日睇業績就唔使頭痕痕啦！

 

 

（Shutterstock圖片) 

 

業績截數日搞清楚，用字不一要留意

 

（Shutterstock圖片)  

 

　　學睇業績第一樣嘢就係要知道公司用邊一日做截數日，而上市規例無列明上市公司一定要用邊日，所以通常大部分公司都以每年12月31日為最後截數日；不過，上市規例就講明，公司需要在截數日後3個月內公布業績，如果未能係限期內公布就要通知聯交所交代原因。所以傳統3月份係業績旺季，而公布業績前後一個月，都可能會有唔少大行進行分析，甚至有「春江鴨」提早買入或者沽貨，所以了解公司業績公布日子就成為炒股留意事項之一。

 

　　咁可以邊到搵到邊一日邊間公司公布業績呢？其實港交所「披露易」網站都會公布上市公司公布重要事項日子，大家只要上「披露易」，搵返「交易所報告」－「董事會議通知」，再揀返係主板定創業板就可以睇到未來幾個月有咩公司公布數據啦！

 

　　另外，因為中港企業對於業績用字都可能會有小小差別，例如內地常用「同比」，香港意思為「按年」；而「環比」即可能係「按月」／「按季」比較，要似乎數據相比嘅期間。仲有一點，公司用邊一種貨幣作為海外業務收入計算貨幣都相當重要！好似近日人民幣飆升，用人民幣計價的話，對業績有正面作用。

 

點解業績無「純利」兩粒字？

 

 （Shutterstock圖片) 

 

　　通常睇業績最常會留意就係收入、毛利、經營開支、純利及每股盈利，不過唔少新手都會好奇問，點解業績報告表無「純利」呢兩粒字呢？因為會計上對於純利有嚴格區分。例如成間公司扣除成本、交稅之後所得，通常被稱為「年度利潤」；不過，呢個利潤並唔代表完全落晒股東口袋，因為上市公司旗下通常都會有唔同附屬公司，而呢啲附屬公司又會分「全資擁有」或者「非全資擁有」，假如主公司將呢啲附屬公司業績合併計算，所得數字可能因為所持公司股權數而受影響。

 

　　所以，會計上為區分主公司同附屬公司利潤／虧損，通常會劃分「公司擁有人應佔利潤」及「非控股權益」兩項，而媒體經常報道公司純利升跌幾多，就係單計「公司擁有人應佔利潤」，亦都係主公司股東個一年所賺嘅純利數目啦！

 

純利數字並非絕對，不同行業睇嘅數據都不同！

 

（Shutterstock圖片)  

 

　　好多人以為純利係公司數據唯一重要參考價值，其實並唔係絕對！唔同行業嘅公司，要參考嘅數據都唔一樣。譬如保險股比較睇重「新業務價值」多於純利，因為保險行業唔似其他行業咁一次過收晒客仔錢，所以每一年做多幾多新保單反而較為反映出公司搵錢能力；銀行股比較睇重淨利息收入、壞帳率；賭股比較注重EBITDA(息稅前盈利）等，不同行業睇嘅數據都差異好大。

 

　　仲有啊！有時公司錄得虧損並唔一定公司搵錢能力差，因為可能涉及「匯率虧損」或「商譽減值」。特別要提提「商譽減值」，意思係當公司收購某項資產時，收購價可能會高於資產嘅帳面價值，而公司要將資產入帳的話，就只能入帳資產嘅「帳面價值」，而突出嘅「溢價」就被視為公司支出，所以最後公司盤數可能由賺變蝕，所以出現呢個情況就要睇盤數撇除「商譽減值」嘅數字為準啦！

 

撰文：李皆穎

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

樂本健【年度感謝祭】維柏健及natural Factors全線2件7折► 了解詳情