四太都「養唔到」？漁護有望特事特辦救救600格力犬？

　　香港有賽馬，澳門有賽狗。不過賽狗呢樣嘢要變成澳門人嘅集體回憶了！事關澳門逸園賽狗場要結束營業，狗會亦都要喺下個月21號之前遷離，成600幾隻格力犬都唔知點算！

嚟緊7月1日仲有一場領養日，亦可能係最後一場。冇人領養嘅格力犬料命途多舛......

600格力犬去向令人憂

　　之前賭王四太梁安琪曾經豪言「我梁安琪全部養晒！」大家諗住一眾狗狗唔駛憂啦，有網民仲笑言「全部送去四太屋企，佢答應過呀！」點知前幾日四太就話「冇地方點養啫！」淨係話同政府傾緊安置安排，睇嚟啲狗狗都係冇得旨意四太「一力承擔」喇！狗會近排都有舉辦領養日，但係聽講反應唔算好好，睇嘅人多出手領養嘅就少。

　　之前有人話，好驚遷離時限一到，啲狗狗就有可能要人道毀滅或者運返內地，不過負責人就話唔會送人道毁滅，但沒講埋落去會點處理班狗狗，但係Jenny一諗起呢排剛好係廣西玉林嘅狗肉節，如果運佢哋返內地，似乎仲慘過人道毀滅……

Miss Mo望港澳兩地可酌情處理

　　一直關注動物權益嘅毛孟靜（Miss Mo）都有留意今次事件，佢就話，而家有5至6名香港人已經正式領養咗狗狗，相信隨時會有100人以上去領養添！不過聽講漁護署嘅防疫中心已經爆滿，要去到今年年尾先再有位，所以佢就同漁護署傾吓有冇得酌情處理，例如喺澳門做檢疫、縮短隔離期等。而漁護署都回覆話有關注今次事件，因為呢批狗狗唔係「街犬」，如果有齊針紙嗰啲，風險評估都可Set低啲、時間可以縮短啲，亦都會同澳門政府研究可唔可以喺澳門做檢疫。Miss Mo就好開心，仲多謝漁護署關注今次事件同埋同澳門政府溝通添！

　　其實狗狗都係一條生命，呢到有成600幾條命，學Miss Mo話齋，救得幾多得幾多，希望可以嚟緊7月1日嘅領養日，會有多啲有心人去領養喇！Jenny亦要在此提提大家，要衡量自己嘅能力先去決定係唔係養寵物啊！唔好貪得意或者趁墟，一時衝動落決定！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【etnet 30周年】多重慶祝活動一浪接一浪，好禮連環賞！ ► 即睇詳情