林鄭自上任以來「戀上」社交媒體，「戀」到做咗特首一周年，都落埋Order叫一班司局長拍返條片輪流擺上Facebook，同市民講吓呢一年嚟做咗啲乜！而Jenny睇晒已經出咗場嘅各個政策局，第一個感受就係咁多位司局長嘅風格，真係完全唔同！

 

 

今日就輪到商務及經濟發展局、財經事務及庫務局局長劉怡翔、財政司司長陳茂波（波叔）同創新及科技局局楊偉雄出片喇！

 

每日有4份功課睇？

 

　　作為特首，林鄭梗係做打響頭炮嗰一個，所以喺正7月1日當日就上載咗一條差唔多5分鐘嘅片，唔知係唔係因為近排忙於搞「娥六招」，唔得閒拍新片，雖然有相有片，但係其實內容都係以前拍落，附上中文小標題「炒」埋一碟，好就好在簡單易明。

 

　　Jenny發現，有啲司局長就好上心，唔只特登為條片拍返幾個Shot，仲親自做埋旁述添！噚日交咗「功課」嘅有政務司司長張建宗、民政事務局局長劉江華、政制及內地事務局局長聶德權及教育局局長楊潤雄4份，今日就輪到財政司司長陳茂波（波叔）、創新及科技局局楊偉雄、財經事務及庫務局局長劉怡翔同埋商務及經濟發展局呢4份喇！

 

聶德權跑步夠貼地 兩位楊局長有字幕就更好

 

　　Jenny暫時覺得最有心思嘅就係聶局長嗰條！佢用自己最鍾意嘅跑步貫穿條片，中間加插一啲工作片段，有意思得嚟又貼地噃！而波叔條片就同林鄭嗰條風格差唔多，不過佢都有特登出鏡做旁述，都加到啲誠意分嘅！

 

　　民政事務局局長劉江華同楊偉雄就分別搵咗啲「外援」齊齊出鏡，劉江華有青年自薦委員陪佢，而楊偉雄就搵咗唔少新興企業家一齊拍，不過Jenny全程淨係留意到佢把「譚仔」口音，仲要冇加字幕，合埋眼聽就好似大台處境劇入面嘅「曹總」係度講嘢咁……

 

　　不過冇字幕嘅唔只楊偉雄，同佢個名好似嘅教育局局長楊潤雄條片一樣係冇字幕，而且仲係咁多位局長入面片長最短嘅添！唔知佢係唔係趕住交功課，成條片亦都冇加返啲背景音樂襯托，如果係學校功課，相信楊局長個分數都只係「僅僅合格」……

 

劉怡翔「處男下海」獻上「第一次」

 

　　而今日上載短片嘅劉怡翔局長，同樣冇幫條片加返少少背景音樂，小妹覺得就好似聽緊書咁！Jenny亦都發現，劉局長喺條片入面好似好緊張，成個人繃緊晒，Jenny打聽之下，發現原來今次係劉局長嘅「第一次」，佢之前都未拍過呢類型嘅片㗎！夠晒珍貴喇！但係Jenny認為最Hea嘅都唔係佢哋，而係商務及經濟發展局！事關佢哋局長邱騰華完全冇出現過喺條片入面，條片亦都只係用一啲散Shot，加啲標題解說，連旁述都冇，睇嚟呢份「功課」，最低分都非商經局莫屬喇！

 

　　而政務司司長張建宗條片，就號稱係佢「自編自導自演」，唔知係唔係佢之前拍得多宣傳片，已經熟晒呢味嘢，想「踩過界」撈埋電影行業？不過解像度就係VCD質素，得360P……Jenny仲發現咗一樣嘢，就係司長雖然喺片中係講廣東話，不過字幕就得英文，睇嚟今日話答英文問題「Waste Time」嘅特首林鄭，可以學吓張宗咁自帶英文字幕呀！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇】立會議員為趕赴酒會合照，在財會上快速通過87億撥款► 立即投票