「Waste Time」風波後 林鄭主動出擊答英文Q實踐承諾

　　上個星期林鄭單「Waste Time」事件，除咗令Jenny同一眾行家譁然之外，亦都引起咗社會廣泛討論，林鄭當晚近凌晨先出稿致歉，不過第二日佢去立法會答問環節嗰陣，一樣被人用英文問題「狙擊」，但係可能當日行程太緊密，佢一聲不響就走咗。大家都心諗，幾時可以再聽特首答行家英文問題？

(設計圖片)

　　Jenny 同大家回一回帶啦！話說「Waste Time」事件事緣上星期二（3日），林鄭喺開行會前見記者，當有英文媒體嘅記者用英文問問題時，林鄭就話建議安排個即時傳譯以免「Waste Time」，就係呢句令到全部行家當場呆咗！因為估唔到為官多年嘅林鄭，會對一直以來中英問題夾雜嘅慣例有微言。

英文台行家成功搶得第一Q

　　嗱！雖然林鄭上星期三就唔理大家走咗去，不過今日又係行會日，佢就按慣例出嚟回答記者提問嘅！既然已經明言無意改變「英問英答」嘅做法，林鄭梗係要身體力行實踐承諾咁作答喇！皆因平時「搶Q」（即搶著提出問題）多數都係中文行家搶到先，今日反而第一條Q就係由英文台記者搶到，即林鄭決定答英文問題先啦，Jenny都覺得甚有意味！ 

　　正當林鄭答完條英文Q，就輪到中文行家搶到機會啦！佢問完之後，亦都提出希望特首以中文回答返英文記者問嘅問題。林鄭似乎要「實踐承諾」到底，即使要以廣東話重複一次都唔介意噃！去到第三條Q，大家都搶到疊晒聲之際，林鄭金口一開：Let the English speaking reporter ask. （畀英文記者問先）！林鄭想再次強調答英文唔係「Waste Time」嘅意欲，相信都路人皆知喇！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【香港好去處】etnet全新頻道盛大推出！全港最齊盛事活動資訊盡在掌握！► 即睇