立法會「業績報告」出爐 梁君彥自評又如何？

　　話咁快就7月中，又係一眾學生哥放暑假嘅時候喇！不過放假嘅又點只同學仔呀，立法會同埋行政會議開埋今個星期都開始放暑假，行會就放到8月21日先復會，立法會仲可以放到10月添！而今日大主席梁君彥就開個記者會，同大家匯報返今年嘅工作先。

梁君彥仲話，自己係一直揸住本《議事規則》同埋《基本法》做嘢喎！

梁振英走咗 通過嘅法案都多咗

　　上年同今年一樣都係由梁君彥做主席，不過話晒上年政府換屆，由爭議多多嘅梁振英換咗做林鄭月娥，唔知政府交法案上立法會又有冇暢順咗呢？Jenny同大家睇返啲數字先：「今年政府共提交了23項法案，立法會通過了27項法案，較上一會期12項增加超過一倍」、「立法會共舉行了42次會議，會議總時數約520小時」、「該42次會議包括4次行政長官答問會，以及7次在本年度新增、以「短問短答」形式進行的行政長官質詢時間。在該11次會議上，行政長官共回答了139項由議員提出的質詢。」

　　雖然林鄭月娥當選嗰陣就被人笑係「CY 2.0」，不過一年過去，Jenny睇返啲數字，似乎行政立法關係真係有改善到噃！計埋極具爭議性嘅「一地兩檢」條例草案，今年立法會都過咗27項法案，足足多過上年12項嘅一倍有多。難怪林鄭都好沾沾自喜，係咁講住呢堆數字！

梁君彥自評：我唔係隻老鼠

　　立法會「業績報告」就出咗啦，咁梁君彥又點樣評價自己今年嘅成績呢？仲要之前過「一地兩檢」嘅時候，又設限時辯論又雞咁腳地趕人走，大家都好八卦想知佢今年會畀自己幾多分。不過梁君彥就淨係講咗個比喻：「我唔係隻老鼠，唔會跳上個秤度自己秤自己」，仲話「公道自在人心」！所以呢個問題，就留返畀各位去評喇！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【etnet 30周年】多重慶祝活動一浪接一浪，好禮連環賞！ ► 即睇詳情