張建宗從不「射波」的秘密係……

　　林鄭上場以來一直強調要「與青年同行」，又搞青年發展委員會又搞青年委員自薦計劃。上年佢啱啱做特首嗰陣，為展現佢親民一面，書展開鑼第二日佢就去咗同一班年輕人行書展，Jenny仲記得林鄭一到，本身可以並排行7、8個人嘅通道都塞到水洩不通，連記者都差啲見唔到林鄭個真身呀！不過，今年林鄭就冇出席呢個活動，淨係搵咗政務司司長張建宗（張宗）代佢嚟。

張建宗今日行書展建步如飛，睇得出隻腳好返晒喇！

　　不過，張宗話晒都係青年發展委員會主席，由佢代林鄭嚟都啱數嘅！張宗仲帶咗本書同大家分享，叫《給青年12封信》。佢話，雖然呢本書係89年前寫嘅，不過仲係覺得入面每一封信都好適合香港，仲引述本書嘅一句話：「希望所有青年都可以談談笑笑、跑跑跳跳！」

張宗最愛「獨樂樂」

　　講起跑跳，張宗之前就因為整親隻腳包咗兩個月腳托，佢話係因為運動而整傷，而家終於好返晒啦！有年輕人就趁機問佢鍾意玩咩運動，佢話係踢足球喎！估唔到司長都咁熱血，唔知有咩波友咁呢？張宗就話其實係鍾意自己同自己踢……仲鍾意將個波大腳踢向牆喎！難怪張宗從來返工從不「射波」啦，因為真波已經射夠啦嘛！不過，Jenny就覺得「獨樂樂，不如眾樂樂」，張宗可以考慮下搵返啲波友，例如立法會足球隊嘅成員，一於更進一步改善行政立法關係嘛。

唔睇新聞會身痕？

　　除咗鍾意同自己踢波，張宗仲話自己仲係一個「新聞發燒友」！佢話佢十年如一日都係5點半就起身，一起身就要開新聞台嚟聽，朝早亦都一定要睇晒香港所有報紙嘅社論，有時間仲會睇埋內地、國外報紙添！張宗仲分享，原來佢喺求學期都鍾意睇政治書、聽新聞同埋聽外國電台，鍛鍊到而家直情係唔睇新聞就做唔到嘢：「熄咗電視就周身唔自在」！張宗真係識講嘢，現場咁多記者朋友、咁多攝影機喺度，Jenny估唔少行家就算明知係公關說辭都好，都會幾受落！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇】特朗普勝出美國總統大選，你點睇未來數年的世界局勢？你認為中美關係前景會如何？► 立即投票