詐騙案層出不窮，各位姐妹唔好FF世上有劉大尉喇！

　　近排Jenny覺得多咗唔少詐騙案件，「倫敦金才俊」、「禮物男」、「美容女」、「金融女」……老是常出現。警方今日就搞咗個半年結記者會，話雖然今年上半年嘅罪案數字比起上年下跌咗，但係詐騙案嘅數字就「逆市上升」，比起上年同期多咗110單！警務處刑事及保安處處長李志恒同Jenny講，當中上升得最多嘅係網上情緣、求職同埋投資呢三類型騙案。

左:行動處處長鄧炳強 右:刑事及保安處處長李志恒。

網上情緣邊有咁多！

　　李Sir話，喺網上情緣騙案中，騙徒多數會假扮海外嘅專業人士或者軍人，利用社交媒體同受害人發展感情，一段時間之後會話自己生意周轉有困難、遇到意外等等，叫受害人過一大筆數去佢嘅指定戶口，之後就會消聲匿跡！唉，有睇開韓劇嘅Jenny都好明白各位姐妹都好想有個「劉大尉」。不過，一個世界得一個劉大尉，已經被喬妹私有化咗啦！除非自問有喬妹咁高質啦，唔係嘅話都係要小心為妙啊！

「借貸專員」咪亂做

　　而投資騙案就一直高企，最近警方先至搗破咗個倫敦金騙案集團，佢哋手法相信大家都好清楚，小妹就此不贅。不過，第三種求職詐騙，Jenny都八到而家嘅騙徒又有新式手法噃！

　　而家社交媒體咁發達，隨時喺Whatsapp同IG，都見到唔少中介招人幫手做兼職、Freelance咁，Jenny都有朋友應徵過。而有唔少騙徒就係睇準5、6月呢啲畢業期，喺社交媒體開Post招募「借貸專員」，仲大大隻字寫明「低成本、高收入」，呃啲求職者向財務公司申請借貸，申請成功之後，啲騙徒就會話「公司會幫你還㗎啦！」叫啲受害人畀晒嗰筆貸款佢，結果過咗還款期被人追數，受害人先知係被人呃咗！工都未搵到反而揹一身債，得不償失！長氣都係要講返句，奉勸大家要時刻警覺，大隻嘅蛤乸係唔會隨街跳㗎，提防受騙呀！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇】特朗普勝出美國總統大選，你點睇未來數年的世界局勢？你認為中美關係前景會如何？► 立即投票