2018-06-22

港鐵黑鑊日日爆管理層何以仍不道歉

#水舞間 #水為財 #水簾洞 #道歉 #道歉條例草案 #對唔住 #補救工程 #馬時亨 #梁國權 #黃唯銘 #港鐵 #沉降 #西鐵線 #元朗站 #高鐵

　　港鐵呢排日日被人爆大鑊，先係沙中線幾個站都有施工問題：紅磡站、土瓜灣站、會展站…… 呢幾日睇住佢愈爆愈多，Jenny身邊的鐵路迷都忍唔住爆：「不如成條沙中線拆咗重新再起過好過啦！」嗱！嗱！嗱！今日港鐵又有嘢被揭發喇！今次輪到已經運作咗15年嘅西鐵線……

港鐵高層（左起）黃唯銘、馬時亨、梁國權３人連日多次見記者，但從未有向公眾公開道歉。

5年前發現上年先開始補鑊

　　是咁的，今日又有傳媒爆料，話西鐵線元朗站同錦上路站之間嘅架空路軌其中兩座橋躉出現沉降，幅度有20毫米。咪睇少呢2cm，工程嘅嘢有些少差錯都可能會引起好大後果！有土木及結構工程師就話，沉降個幅度去到25毫米，就會影響到個建築結構，令橋面同埋路軌傾斜，列車行駛時就會撞到路軌！更甚者，因為列車日日都會行駛，撞擊到路軌就會進一步影響橋躉承托力，情況嚴重嘅話橋面係會脫離喺橋躉跌落埋嚟……

　　港鐵都承認，原來早喺2013年就發現問題，仲叫埋喺隔離做緊工程嘅新鴻基住宅項目Grand YOHO第三期的地盤停工。但係佢哋同新地傾足4年，傾到上年先開始做補救工程，而呢段時間西鐵線一直都冇停駛過，唔知會唔會因為咁會沉多幾錢重，都咪話唔驚！

道歉，其實唔難！

　　噚日港鐵3個高層馬時亨、梁國權同埋黃唯銘，就沙中線啲事故出嚟見行家，係咁被人追住問邊個要為今次呢幾壇嘢問責，佢哋都只係強調返當務之急係要搞返啱呢堆手尾先。之不過呢啲嘢一開始如果做好啲、Check足啲，咪唔駛搞到而家咁頭痕囉！只可惜到而家，管理層係就係都認咗有不足，仲話責無旁貸，但連一句正式嘅「對唔住」都冇講過出口！

　　今日又爆單元朗站出嚟，唔通佢哋想方便啲，等再爆多幾單先，儲埋一次過道歉？其實上年立法會都通過咗《道歉條例草案》，列明道歉時，唔會構成承認過失或法律責任。「對唔住」呢三個字，要講嘅話其實唔難。Jenny覺得，喺呢個Moment，港鐵點都欠市民一個道歉，邊個要問責、邊個要下台，呢啲都係後話！

　　不過，港鐵而家喺大家嘅心目中，除咗成日故障之外，仲會畀人tag佢「水為財」，事關高鐵西九站、馬鞍山線沙田圍站、南港島線海怡半島站、西港島線西營盤站、荃灣線荔景站，全部都試過變「水簾洞」，但一於水照漏價照加。呢排雨季又到喇，Jenny最怕等等下車，突然間有免費「水舞間」睇......