街工梁耀忠（阿忠）大大話話都叫做咗6屆立法會議員，不過上次「唔做主席」事件之後，Jenny先知道佢呢廿幾年嚟原來只做過委員會主席一次咁大把㗎！如果世界上有一個病叫「做主席恐懼症」，Jenny估阿忠應該可以舉手做Case。

 

 

難得有權在手竟拱手讓對家

 

　　可能有啲讀者都未必知阿忠單「唔做主席」事件。是咁的，因為阿忠喺立法會資歷第二高嘅議員（第一高係民主黨涂謹申），而喺一啲未選主席嘅委員會，係要靠委員會入面資歷最高嘅議員暫時主持，直至選出主席，所以阿忠好多時都要做呢個「暫代主席」。

 

　　話說，上星期有網民就發現，阿忠為咗唔做一個小組委員會嘅主席，竟然求「對家」民建聯嘅黃定光（象哥）做埋佢喎：「唔制呀！你知我唔鍾意做呢啲嘢㗎啦！」對主席呢個位耍手擰頭。

 

網民鬧爆阿忠不負責任

 

　　不過睇嚟主席都唔易做，象哥同在席嘅潘兆平都一樣唔肯做呢個主席，結果仲要暫停會議10分鐘等其他人返嚟，結果阿忠搵咗同樣係「對家」嘅工聯會何啟明做。

 

　　呢單嘢一爆，好多網民都鬧爆阿忠不負責任，而且做咗咁多年議員都未做過主席實在太匪夷所思喇！結果阿忠今日上劉慧卿（卿姐）個節目，卿姐都第一時間八吓呢單嘢先！阿忠就澄清返其實自己都做過一次主席嘅，就係上年嘅人力事務委員會。

 

卿姐反眼反到上天花板

 

　　佢話，因為覺得做主席就只係主持個會議，而唔可以隨時發言，所以就一直都唔想做主席囉！卿姐似乎都唔多接受呢個講法，話：「咁其他人都唔駛做主席喇！」仲話呢件事都係有行家轉述畀佢知，嗰位行家都覺得做得好肉酸，直言：「何必呢阿忠！」

 

　　不過阿忠就好堅持佢自己嘅睇法，雖然都話感到「抱歉」、「下次可以做好啲」，但係都係堅持「有得揀唔做都唔想做」、「可以都盡量唔做」，卿姐反眼反到上月球，只能嘆句：「我都冇你咁好氣呀！」莫講話卿姐吖，Jenny都反眼喇！喂！咁選民選你出來做咩呀？

 

街工隨時滅黨

 

　　講起街工，相信唔少讀者都淨係會諗起梁耀忠，就好似講起民協淨係諗起馮檢基（基哥）一樣。唔係話佢哋做得特別好喎，而係因為佢哋黨淨係得一個人係市民噏得出個名，即係傳承工作做得唔夠啦！

 

　　咁搞法一係就啲新人冇能力接棒，一係就會被人質疑係「永續參選」，但係無論係邊樣都唔係好事囉！之但係阿忠呢排咁多負面新聞，又冇錢去做返啲宣傳，搞搞下，下屆立法會都唔知仲有冇街工份喇！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【etnet 30周年】多重慶祝活動一浪接一浪，好禮連環賞！ ► 即睇詳情