繁簡之爭間唔時就會翻炒，其實漢字歷史源遠流長，一個字藏住嘅大大學問，不過爬格仔搵食嘅Jenny，因為用慣用熟，反而唔多留意。咁啱Jenny今日去完一個叫「漢字展」嘅展覽，發現原來睇「字」都可以欣賞到好多嘢㗎！

 

 

策展人區德誠

 

一個不懂輸入法的設計師

 

　　Jenny就同展覽嘅策展人，香港著名設計師區德誠（Benny）傾過，佢話今次展覽搵咗過百個來自香港、內地、台灣、澳門、日本同韓國等地嘅設計師，展出佢哋近300幅作品。Benny一開頭就同大家講，而家唔少人都由手寫字轉成用輸入法打字，佢搞呢個展覽，就係想睇睇年輕人嘅留意程度，同埋一啲有返咁上下資歷嘅設計師，喺呢個世代對漢字有冇變化。佢仲話，自己而家都唔用輸入法，一直都只係用手寫板。Jenny完全feel到佢對寫字嘅嗰一份執著！

 

　　Jenny見到呢啲作品有畫作、有書法、有拼貼、亦都有數碼形式的設計等等，睇到眼花撩亂，不過Jenny最有印象就係Benny嘅一句說話：「越簡單的設計越難做。」所以Jenny最有印象嘅，就係由一班藝術家用自己姓名嘅其中一個字作畫，當中有一位年輕藝術家羅曉騰用咗佢個姓氏「羅」嚟創作。

 

年輕藝術家羅曉騰和其作品「簡單的快樂」，大家睇唔睇得出個「羅」字？

 

罰抄自己個名 成就「快樂」?

 

　　羅曉騰同Jenny講，因為佢個名筆劃好多，所以細細個嘅時候好怕被罰抄自己嘅姓名，由細到大都想簡化佢個姓名，今次佢就以幾何圖形砌出個「羅」字，並將呢幅創作命名為「簡單的快樂」。佢仲話，好開心創作出一份可以令人「細味」嘅作品，似乎都幾滿意今次嘅創作噃！

 

　　唔好話Jenny唔提大家，個展覽由今日開始喺PMQ舉辦，直到下個月10號，大家有機會都可以去欣賞吓喇！仲係免費㗎！就一於去見識吓「字」嘅可能性！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

樂本健【年度感謝祭】維柏健及natural Factors全線2件7折► 了解詳情