呢排有傳羅范椒芬不再續任科技園主席，噚日羅范就認咗會喺月尾退任主席一職，今日政府都公布咗新任主席人選，原來搵咗李嘉誠個外甥、有「磅秤大王」之稱嘅查毅超接手！

僅做4年就byebye 羅范想要個解釋

　　不過多數人做公職都會做滿6年限期，但係羅范今次淨係做咗4年就唔續約，政界中人都話呢個情況屬罕見。而且羅范之前先講完上年唔選港區人大代表，就係因為想「全心全意推動香港創新科技發展」，點解會轉個頭今年就唔續約科技園？

　　而早在傳出羅范唔續任嘅消息嗰陣，已經有人話係因為羅范同創新及科技局局長楊偉雄不和，而且都唔係今屆政府嘅事，只不過係因為林鄭組班時，廚房實在太熱，搵唔到人肯入，楊偉雄又未至於「差到要換人」，咪由佢繼續做囉！但係羅范就對楊偉雄嘅工作甚為不滿，甚至向政府高層批評過楊添！至於羅范喺承認不獲續約嘅時候，都講埋係今次係政府決定，原因要由政府解釋咗之後，佢先會初步回應喎！

分手要狠 踢走「梁粉」?

　　之但係今日Jenny喺立法會就聽到另一個講法喇！呢個講法就嚟自民主黨嘅涂謹申（阿涂），佢就覺得羅范冇得續約係一個「政治性決定」，因為現任特首林鄭想「去梁振英化」，踢走晒啲「梁粉」咁話喎！Jenny都覺得唔係冇可能，諗返起林鄭由參選到而家，一直都好想搣甩「CY 2.0」嘅稱號，而且有分析指楊偉雄本身都唔係一個好強勢局長，羅范又係行會成員，又做過資深政務官，好難相信一個局長就可以激走佢囉！

　　林鄭成日都將「管治新風格」、「理財新哲學」掛喺嘴邊，今次科技園有新面孔都幾好吖，不過風格新唔新呢，就要睇下先知喇！今次就辛苦楊局長抵啲諗，食咗死貓佢嚕！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

樂本健【年度感謝祭】維柏健及natural Factors全線2件7折► 了解詳情