《十年》前傳－《一年之奪命金獎》正式上畫。

 

　　今個星期，大家都能深切感受到，皮影戲繼續上映，每個演員都落力演出，七情上面，如入無人之境。喂！係呀！《十年》邊係最佳電影啫？剩係呢一套前傳都已經揮低晒全部候選電影啦！

 

　　《一年之奪命金獎》呢套戲講咩？就係有一日，有一套戲攞咗金像獎最佳電影，有班有錢人極力反對呢個賽果，之後唔只金像獎嘅獎項選舉，連全港所有選舉，上至特首選舉、下至小學班長選舉，都有一班有錢人組成「選舉委員會」去訂定人選，再由大家「一人一票」選舉，所有結果事前已經知道，方便行政吖嘛！自此香港和諧，十咩年啫，一百年一千年都係咁和諧呀！諗諗吓，原來頒最佳電影俾《十年》可能係一個局......因為「呢十幾年嚟，我哋學得最多嘅，係陰謀論。」

 

　　你明唔明，點解呢個結果明明係有啲荒謬，但係電影界仍然要投俾佢？

 

　　呢兩日帶嚟嘅反應，就係最好嘅答案。

 

　　香港影業協會理事長洪祖星：「《十年》得獎是大笑話，要檢討評審機制係咪有漏洞，提議評審團改由各電影屬會推薦人出來做代表。」金像獎喺一班電影界「大哥大」同投資者眼中，一直都係一個「私人Party」，2011年金獎像將最佳電影頒俾小本製作嘅《打擂台》已經屬於非常破格，但今年一有一個結果唔滿意，就即刻出嚟指控金像獎評審係「小圈子」，要求改革制度，而且係以一個既得利益份子，建制身份去講呢番說話，真係曲都拗返直、死都拗返生，非常之有信服力嘅啫！

　　

　　而家唔係好似選委會咁樣，選一啲都唔知熟唔熟悉香港現況嘅人去選特首，而係搵返電影界的人去投選各獎項結果。點解以往就係專業，今次就係唔專業？點解選咗一套明顯反叛嘅戲，就係「有漏洞」？

 

　　《葉問3》監製兼出品人黃百鳴：「50萬製作點叫最佳電影？冇起身走人已經係忍住。」已經唔想提佢連套戲都冇睇，就大肆批評。光係用錢去衡量電影的優劣，呢種諗法一傳出世界各地的電影市場，經已貽笑大方。另外，難道閣下嘅賀歲片系列，連得啖笑都已經做唔到嘅時候，又好值得觀眾再三回味？

 

　　寰亞電影主席林建岳：「《十年》得獎是電影界的不幸，政治綁架專業。」政治是禁區，我都係今日先知道，原來創作自由嘅空間係可以收到咁窄，但凡政治都唔可以同電影掛鈎嘅話，《五個小孩的校長》在講教育問題，《踏血尋梅》以一宗謀殺案講新移民問題，最後都要訴諸到政治制度問題，《智取威虎山》更加係改編自樣板戲，呢堆戲應該全部都out！

　

　　資深電影人可能覺得《十年》好膚淺好浮誇，太explicit，但一班年青導演，的確用到肉嘅方法講埋出嚟俾你聽，佢講緊政治，一幕幕仿似係想像，但強拆、普教中、被失蹤、以至各種抗爭被鎮壓，呢啲都正正係香港人面對緊嘅真實處境！定還是被定義咗嘅「香港電影」係容不下想像空間？不如叫電影辦寫一個規則出嚟，講香港唔拍得啲咩內容嘅戲，同大陸睇齊啦好唔好？

 

　　《十年》其中一個單元《自焚者》嘅導演周冠威，出席一個電台節目時提到，呢套戲係希望激發大家思考十年後香港係點，唔係要預言，只係想大家諗吓，而呢套戲就係五人各自又同時嘅共同想像，製作出一部能夠令人反思社會現況，思考將來，令大家感受到「切膚之痛」共鳴的電影。但如果連諗吓都唔得，講下都唔得，呢度仲係咪香港？

 

　　《十年》前傳－《一年之奪命金獎》冇中場休息，繼續放映。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇】9歲泳手一度被拒參賽，議員指泳總執委會長兼任上訴委會長欠公正► 立即投票