亞視鬧劇持續一年多，至今尚未落幕。從上月初開始，亞視多次陷入停播危機，次數就來兩隻手都數唔晒。所謂新買家「中國文化傳媒」未能按法例要求準時出糧，拖完十二月，就拖一月份糧。員工走了一大半，新聞一度停播，觸發通訊局展開「釘牌」程序，債權人王征又向法庭申請將亞視清盤，排期四月中審理，但亞視都仲未死得。

　　

　　德勤獲委任為臨時清盤人，兩星期以來一直與「中國文化傳媒」的司榮彬一方周旋，雙方在上星期上演攻防戰，德勤在星期四曾指出司榮彬一方未能交出現金，顯示佢哋有能力營運亞視，所以決定喺星期五遣散亞視所有員工，並會招致停播。到星期五朝早，代表司榮彬的股東何子慧一招「賭聖SHOW HAND」，向傳媒展示一個載滿現金....同埋白色盒的行李喼，表示他們可立即送贈五百萬元現金及五百萬元劃線支票給亞視。大家期待已久嘅一刻冇發生到，當晚德勤和司榮彬一方達成有條件協議，容許亞視營運至四月一號牌照期滿。

 

　　當大家以為可以休息一下，等到四月好好哋送亞視一程。前日德勤指司榮彬違反協議，冇完全履行承諾交低足夠數量嘅錢俾亞視營運，協議失效，德勤可能隨時將亞視熄機。司榮彬一方反咬，指德勤未盡專業，並由何子慧向法庭申請撤換德勤作為臨時清盤人的資格，之但係喎，何小姐居然文件都冇帶齊！暫時未申請到......

 

　　峰迴路轉，嘆為觀止，死相難睇......

 

　　對於唔少網民嚟講，都好想快啲推小鳳姐出來，為大家高歌一曲「熱烈地彈琴熱烈地唱」，但即使小鳳姐已經在後台化好晒粧，仍未出得場，要留在後台。老實講句，小弟曾「有幸」在亞視做過一段短時間，經歷過裡面的事，百般滋味，其實真係笑唔出。

 

　　亞視係香港嘅縮影，或者係預示未來嘅一面鏡，呢個比喻我覺得幾貼切：曾經風光一時，但近年終日只能食老本，劇集重播，綜藝有限度運作，新聞部苦苦支撐大部分新製作，但不停換畫的「投資者」根本都不知道現實是什麼，活在一個個虛浮、假大空的想像裡過活，但現實生活中逐步被唾棄。顧著吹噓沒基礎的想像，從王征的「亞洲CNN」，到司榮彬講啲咩「三亞策略」，唔知仲以為佢哋要去海南島發展。原來係話要發展衞星電視同OTT。有冇兌現過呢？眾所__知。

 

　　班「投資者」，其實就係投機者，佢哋經常強調，呢間係一間五十九年歷史嘅電視台。噢，所以呢？「所以我哋要保留住佢，唔可以俾佢執！」問題就來了，係咪每一日都提醒自己，呢間係一間好耐的電視台，間公司就可以做落去？員工就要無償咁留低，繼續同你一日一日咁數手指，數住第幾年第幾日嘅歷史？五十九年歷史可以當飯食？做過亞視的人都知道，亞視最值錢和最濃厚的，就是人情味，因為長期積弱，前線員工都很團結。投機者們就係睇中呢點，用「情」來牽引住啲人，利用大家對公司的感情，來避免應該負嘅責任。　

 

　　說穿了，就是大陸化的遺害。預見得到睇緊嘅人會想在下面留言鬧我，話我政治化同歧視，但你們不能否認的是，大陸做生意的階層根本不重視法規，很多都只愛打人情牌，到今時今日都沒有改變過。他們喜歡提出一個個願景，用以吸引其他潛在買家「泵水」，但到別人「落搭」了，就發現原來是財金騙局，然後下一手繼續用類似做法，無限LOOP。負責處理爛攤子的德勤華南區主管合夥人黎嘉恩亦在接受傳媒訪問時指，如果係香港人做老闆，未必會拖糧，會驚。大陸人係點呢？佢冇講到，但大家都明。

 

　　亞視的泡沫爆破了，大陸手法讓亞視毫無尊嚴地逝去，我真係笑唔出，因為香港都好可能行緊類似的路。最後給司榮彬等人禮貌的一句：「請你好好放低。」

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

想要獨家投資理財Tips？即Like etnet 全新Facebook專頁► 立即讚好