香港第一愛登士家庭又創新猷，鑊鑊新鮮，繼二女齊昕曾被網民奉為「民主女神」皆因有力連番令梁特崩潰，今次輪到幼女梁頌昕聯同母親，抱住「My dad is CY, today I take Cathay, one day I can fly!」嘅精神，力挑機場職員，希望繞過正常程序，借第三者之手將出境時喺保安檢查漏低嘅手提袋，帶到已完成離境程序、在登機閘等候登機的梁頌昕手中，行動仿如公民抗命，真想替她們大呼一句「佔領機場，正式開始！」

 

　　根據洩漏畀傳媒的國泰航空內部文件，件事已經可以確認係千真萬確有發生過，只係當中細節似乎未有正式定論，例如據報道指出，該消息人士透露，當小龍蝦同機場職員僵持嘅時候，佢打咗畀親愛嘅父皇，然後呢一通電話唔知點解會去咗職員嘅耳仔邊，呀父皇仲要求呢個低層職員「叫我梁特首」，梁特首聲明否認，學五毛話齋；「剩係得啲文字同一兩張離遠影嘅相，你話梁太同機場職員埋身肉搏都得架啦！」

 

      昨日特首一家喺黃昏先後以書面聲明回應事件，由事件揭發到出到聲明，差唔多用咗20小時，對擅長玩文字偽術嘅689嚟講，算係好長時間。咁當然，份聲明都係一以貫之，喺承認事件有發生嘅同時，喺交代細節時轉彎抹角，再將責任交返畀老婆同個女。其實呢種玩法都已經用咗四年，由僭建開始、到UGL五千萬、再到幾宗利益輸送疑雲，玩法咁一致，多謝你教識香港人點樣喺語言偽術品當中尋找真相。

 

      兩份聲明帶出嘅客觀事實就係，原本件事係由梁頌昕同梁唐青儀分別喺登機閘口同離境大堂處理緊件事，梁振英打電話畀梁頌昕知道有呢件事之後，個電話「唔知點解」去咗國泰職員手上，冇叫職員「叫我梁特首」，但有冇講其他嘢突顯身份呢？綜合消息人士指係有嘅，同時間，梁太係有促請機場職員配合佢嘅要求，繞過正常程序由職員將個袋攞返出境畀個女。梁振英有冇講其他嘢呢？暫時不得而知（唔知有冇人有錄音呢？如果有就大家都開心啦。）。聲明所指「沒有向任何人施壓」以及「沒有使用等權」，呢個對689係客觀，但對職員而言，就係主觀。而最重要就係，喺雙方糾纏近一小時後，個袋係喺梁小姐不動如山嘅情況下送到去佢手上，順利登機。 

 

      我最驚訝嘅係，聲明竟然冇話要保留法律追究權利，律師信都冇出，係咪689平時用開間律師樓執咗笠？定係出得太多律師信絕咗交？有人指出，今次突然有人爆鑊，係因為民政事務局常秘馮程淑儀及其原本任職機管局企業發展執行總監嘅老公馮永業捲入換樓貪污醜聞，懷疑有人報仇。哎吔，梁氏一家真係慘，明明濫權濫得咁開心，竟然畀人玩復仇，咁多仇家，咁快啲丟低晒啲行李返英國，同齊昕一齊過幸福日子啦！

 

      國泰職員跪低、機管局跪低、整套程序都跪低埋，我最佩服葉國謙面不紅耳不熱咁行出嚟，叫機管局檢討規矩，有利啲「失暈魚」，唔容易架，可以恬不知恥咁講歪理維護老細，不如你叫美國同歐洲檢討吓，參考六先生一家人嘅做法，咁可能可以感化到啲恐怖份子添！

 

      四年啦，乜嘢國際標準都喺六先生手上敗清，而家連一套國際成文嘅保安程序都顛覆埋，我諗佢好快就會稱帝，然後香港變成諸候國，臣服習天子服下。或者，成件事最錯唔係梁家，而係當初點解有人屈服喺權勢之下。又或者，要企硬，真係唔係咁容易。

 

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【香港好去處】etnet全新頻道盛大推出！全港最齊盛事活動資訊盡在掌握！► 即睇