我哋都唔能夠否認，人類生來就好似活喺一個鳥籠，只是活在不同的地方，鳥籠的鐵欄空隙有窄有闊，這就視乎我們身處的地方，究竟是否自由。以前的香港，鐵欄空隙時鬆時緊，但總算有透氣空間，即使是回歸後頭幾年，尚算係講咩都得，雖然講完出嚟，如果係唔同意見嗌交難免，但起碼同深圳河對岸比，尚有自由空氣。

 

　　銅鑼灣書店五人被大陸扣查事件，對身邊不少人來說，都觸及底線，那條井水河水的界線從此模糊，鳥籠的鐵欄其實沒有收緊，因為都冇用啦，直接就喺籠外面笠咗一個鐵幕。你窒息咩？咁你死你事啦。連一向政治深藍的家母，看到此事發展，都講咗一句「太明顯啦…」，我驚訝，問佢咩咁明顯，佢話「大陸做得好核突，原來係可以咁樣捉人上去唔使交代。」

 

　　四個月來，我哋就係坐咗喺呢個鐵幕鳥籠裏面，睇住一齣齣皮影戲上映，而喺紙幕後係一個個被操縱嘅身影，講住一啲我哋好難明亦唔想明嘅語句，睇住紙幕，疑幻似真、朦朦朧朧。

 

　　而嗰齣名為《一國兩制》嘅皮影戲，就好似亞視咁醜陋地步向大結局。李波上週經落馬洲用「正常方式」、沒有回鄉證之下順利回港，某傳媒又「咁啱得咁橋」喺口岸見到佢，即刻扑咗幾分鐘咪，其間再次重申自己：自由安全冇受脅迫一國兩制好好大家唔好揣測我唔會再用偷渡方式返去配合調查香港人唔好再記住佢呢件事。

 

　　同「被偷渡」返上大陸之前嘅李波，完全係兩個人。昨日，有另一個傳媒指李波已經在港回復正常人生活，內容詳細列出李波在本星期初現身香港時的行程，連鄰居跟他問候一句也列出，該報更「獨家獲得」李波的自拍照。(相片非常高清，想必李波有一部擁有鏡頭超越現有所有規格的電話，以用作自拍。)

 

　　吓，李波上星期返嚟時，唔係叫傳媒放過佢咩？

 

　　呢一種被拘留後出現大轉變，言論跟從劇本嘅表達方式，一直都喺大陸上演，近年知名案例包括維權人士趙連海、記者高瑜，到近期《南方都市報》總編輯長平，在facebook披露，他的家人被中國公安拘留，態度大變，要求長平刪除文章，他指是因為自己早前在海外網站發的一篇評論，有關《無間新聞》早前刊登要求習近平辭職的公開信的風波。

 

　　以上各人，不論認罪、或悔改、或轉軚，他們都不是噤聲咁簡單，而係要讀一篇好有背書感覺嘅對白。係呀，我覺得直情擺到明係對白，破綻百出，亦正式將《一國兩制》呢台戲畫上完美句號。因為已經完全將大陸嘅一套手法，搬落嚟香港，法理蕩然無存，鳥籠正式封閉。無錯我喺度講嘢反對佢哋都冇事，但只係因為我講嘅嘢對佢哋不痛不癢。如果想揭露政權真相 (講白啲，係習近平嘅真相)，甚至乎，只係為仔女嘅健康維權？下場係點，太明顯了，大家都唔會再讀到我一粒字。當呢種恐懼落到嚟香港，《一國兩制》還有戲唱嗎？

 

　　其實點解要當我哋香港人係白痴？

 

　　或許，我哋唔係白痴，而係我哋已經成為咗呢齣皮影戲嘅演員，唔知邊個隨時會做主角，走到紙影後，成為被牽引嘅一個，《一國兩制》大結局了，但整套連續劇的大結局何時發生，仍是未知之數，但都幾肯定唔會早得過《愛。回家》、亞視、關鍵同埋太陽報嘅大結局。

 

　　呢一刻，就睇吓你想改寫劇本，定係繼續跟住紙影後嘅操盤人一早擬定好嘅劇本行落去啦......

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》心理急救II：幾個徵兆辨認身邊人需要心理支援！點樣對情緒進行急救、自我照顧？專家分享穩定情緒小練習► 即睇