新一年，新欄目，新年快樂！

　　首次見面，先同大家打個招呼，小弟「思畸」，現職傳媒，眼見現今政壇仲有趣過娛樂圈，想笑埋一份，幸得版位，多謝Sh…唔係，係多謝編輯，多謝經濟通。另外，小弟間中童言無忌，不喜就右上角按交叉走人，你開心時、我都開心。

         年初一旺角一場「魚蛋騷亂」，是近年第一次出現示威者大規模向警察武力還擊的場面。偉大嘅特首強烈譴責「暴徒」，強調件事絕對唔關「魚蛋」事，只係無業人士以及激進勢力無風起浪！多個界別都聞歌起舞，齊聲譴責，前保安局局長李少光形容「暴徒」行為猶如禽獸；「譴責聖手」中國外交部譴責香港出現「分離主義」暴力亂港；現代香港「抗爭鼻祖」工聯會更加痛改前非同心譴責暴力，睇嚟佢哋經過五十年嘅洗禮，終於覺悟當年同路人嘅暴力係唔啱啦！

         但我始終覺得，李慧琼子那一句譴責之聲最振奮人心，佢出席城市論壇時提到，大眾要同暴力切割，否則事態就會發展到好似「ISIS」咁。嘩！原來我哋嘅一聲譴責係咁有用！連恐怖分子也可以撲熄於萌芽之時，那我們是否也要由民建聯領導全球一齊同聲譴責真ISIS暴行？我相信他們明日必定會停止戰爭，向正義投降，一定會係咁，除非唔係！你睇吓，呢幾日旺角幾平靜呀，肯定係驚咗各界人士譴責啦！

        講真，激進分子會因為你們的聲聲譴責而停止嗎？恐怕最後只會適得其反，因為真正的問題根本都未解決！睇返這幾天建制一方的輿論，都嘗試將騷亂當日嘅暴行，同政府嘅管治切割。沒錯！單看當晚行為，擲磚者下下要命，已非任何抗爭所能接受的暴力程度，更不要得的是打記者！

         但個人認為，當晚同歷史上多次暴動始終有一個重要分別，就是冇一間店舖被搶掠，「暴徒」們施暴對象，從頭到尾都是「警察」。

         背後原因，或許是因為抗爭者抵受不了政府和警察幾年來「有權用盡」，警察過份武力、濫權事件層出不窮。這年多以來，有冇人疏理過警權過大嘅指控？添馬政府除了為鞏固管治不停護短，不停譴責、斥責得很爽，但難做的問責，就唔想做啦！就連最基本去調查這年多以來我城抗爭逐步升級的責任，也害怕去做……

         可能，思歪心裏明白，自己就是問題所在，所以對付提出問題的人，理所當然係除之而後快。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】《施政報告》提出醫療改革，盧寵茂表示日後普通科門診擬只接受弱勢群體，你是否支持？► 立即投票