20/09/2022
《一點燭光》嚇死輝哥
任何大型活動,要增加聲勢,產生最大震撼力,首要有兩招:一、由巨星作代言人;二、有一首家傳戶曉的主題曲。
剛剛逝世的英女皇,1986年訪港,香港電台負責製作極品級大騷《英女皇訪港大匯演》致敬,傾盡全港台前幕後精英一同瞓身搞。呢類大Show,個個巨星爭崩頭做,易搵。
英女王1986年訪港,親臨紅館參觀大匯演,1700年青人現場唱出《這是我家》。
兩位音樂巨匠——黃霑、顧家輝。
主題曲又如何?當年香港最勁的作曲填詞,當然是顧嘉輝及黃霑。兩位大師聯手出擊,肯定「冇得輸」。結果,炮製出一首《這是我家》的組曲,大匯演當日,由1700人唱出,震動散落全球的香港人心靈。大家可上網重温,「資深香港人」一定感動到入心入肺,再看看今日這個「東方之珠」境況,眼淚真會奪眶而出。
「資深香港人」一邊聽《這是我家》,一邊見證「東方之珠」的巨變,可會眼淚奪眶而出?
幾十年來,香港電台製作無數大型公民教育campaign。其中一個,為1981年的《香港國際傷殘人士年》,全球代表雲集,當然要一首感動人心的主題曲貫穿整年活動。
其時,大總帥為日後的副廣播處長吳錫輝。當年,香港電台的年青人節目,與商台的,日日砌到落花流水鬼哭神嚎,兩台領軍人物分別為吳錫輝及俞琤,心態上,大家都完全唔衰得,兩軍對陣,鋪鋪擦出火花。
港台吳錫輝領軍《青春交響曲》力撼商台俞琤《六啤半》,鬥出香港電台業的黃金時代。
單單一個《香港國際傷殘人士年》,已可谷起成個港台的勢,故輝哥(當年人人稱佢Raymond)施展渾身解數,密密部署一首必爆主題曲。
首先找來擅作正派歌的陳秋霞出手,再揾鄭國江老師填詞,很快,一首入耳又形象正派清純的《一點燭光》面世。
搵邊個唱呢?形象上,羅文、鄭少秋、甄妮、徐小鳳……等巨星,全部唔啱。
論氣質,論聲線,一致公認非由關正傑(Michael)出馬不可!由佢演繹,爆硬!
輝哥速速出馬。不過,關正傑對名利並不熱衷(近十年,有人狂擲億億聲請佢復出一次都堅拒!),要請佢出山,難道非常高。
終於,拋出一個條件:「Raymond,咁啦,我明天出海玩風帆,你跟埋去,一邊揚帆出海一邊解釋歌曲、歌詞及整個活動意義啦,好冇?」
邊有得唔好?不過,真真大大鑊,搞到輝哥通宵失眠。點解?因佢天生忌水,完全不擅泳,游泳池都唔敢試,更何況揚帆出海咁「危險」?極度擔心一個唔覺意墮海,死梗!
英明神武的輝哥,原來一見海洋即變膽小如鼠。
不過,當年我輩工作,絕對拼命三郎,個個「以目標為結果」,死就死,一定頂硬上!
呢種精神,不知成就了多少未為人知的「不可能的任務」。
終於,關正傑有感輝哥搵命博,寧願嚇到瀨尿都上船,於是,應承唱《一點燭光》。
《一點燭光》MV,橫掃樂壇。
一唱,即成中文金曲及社工界的「聖歌」。40年後的今天,凡有社工晚會,也幾乎是必唱的主題曲。
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【慎防受騙】偽冒《經濟通》投資群組頻現,切勿誤信騙徒,如有疑問,請循官方渠道查詢► 了解詳情