10/01/2019
【營銷都要夠AI】做好產品只是基本?大品牌都在研發對應手機App
今個星期,美國最大型消費者電子產品展(CES)喺美國拉斯維加斯舉行。除咗傳統電腦、手機、軟硬件廠商推出一系列新產品外,幾大美容同個人護理品牌亦推出自己專屬嘅配套電子產品,以下同大家介紹幾個。
護膚品牌 L'Oréal 推出檢測皮膚 pH值嘅可穿戴式裝置(My Skin Track pH),畀用家隨時檢查皮膚嘅酸鹼值。用家只需將裝置貼喺手臂內側皮膚上,裝置就可以透過收集汗水,檢測出皮膚 pH值。皮膚嘅酸鹼值原來同幾大皮膚問題息息相關,包括濕疹、皮膚炎、過度乾燥等。透過對應手機 app,品牌就可以利用呢啲數據,向用家推薦適合佢哋嘅護膚產品。
另一皮膚護理品牌Neutrogena就推出可以同手機組合嘅硬件裝置。呢個裝置包括12顆LED燈同30倍放大鏡,幫助用家檢測毛孔大細、狀態、皺紋、濕度等,然後透過app提供詳細皮膚分析同個人化護膚建議。而佢哋稍後亦計劃喺同一個 app,利用手機嘅3D相機,掃描用家嘅面部輪廓,為客戶 tailor made 最啱面型嘅面膜,然後寄畀客戶。
牙齒護理品牌 Oral-B 之前已經推出過藍芽電動牙刷,今年佢哋運用人工智能(AI),透過牙刷上嘅感應器,紀錄用家嘅刷牙習慣,例如力度係咪合適、某隻牙齒或口腔位置需要刷更長時間等等。每次刷完牙,手機 app 都會畀返一啲意見你,同你上一堂「正確刷牙課」。
呢枝牙刷做測試嘅時候,測試人士嘅平均刷牙時間由之前嘅 30-60 秒,增加至超過牙醫建議嘅兩分鐘。主要係因為個 app 能夠提供個人化建議,令用家更有策略、更有心機去完成刷牙呢項工作,亦變相令刷牙更有趣。
好多傳統只做產品或零售嘅行業都陸續推出同手機有關嘅服務或副產品,希望利用手機 —— 一個大家每日都花極多時間嘅平台 —— 提高客戶忠誠度,賦予產品更多額外價值,從而搵更多生意。除咗以上嘅化妝美容、個人護理產品,手機相關服務已延伸至各行各業,包括西餅麵包、餐廳、地產代理、商場、家用電器、寵物用器等。現今各大品牌除咗要做好產品本身質素同基本 marketing,更要花錢花時間去照顧好大家嘅 mobile user experience。
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】教育局最新初中教材提出應堅拒婚前性行為,你認為教材內容是否不合時宜?► 立即投票