朋友家宴，鎮桌之寶係鱷魚湯，佢順便講個鱷魚笑話：

　　休閑業鉅富巡視旗下業務，來到水上樂園，鱷魚潭係園中旅遊熱點，鱷魚偶然張開大嘴，掛住水草、滴住水串，又醜又兇。

　　鉅富一時興起，向所有遊客同工作人員講：

　　「邊個夠膽跳落去？有命游上岸獎五百萬，冇命嘅我賠一千萬，傷咗嘅我包醫藥費，兼贈三百萬。」

　　眾人你眼望我眼，冇人響應，突然「頂揼」一聲，一個男人跳入池中，鱷魚成日未食過嘢，以為係假日特別餐，咁大件，又新鮮，博命追！那男人拼咗老命游番上水，全身滴水，手心滴汗咁接過五百萬支票，然後咆哮：

　　「邊個推我落水？」

　　「嘻嘻，係我！」佢老婆笑笑口答。

　　席上友人哄然大笑，然後各抒己見：

　　「呢個故事嘅教訓係：女人不可不防！」

　　「個老婆真聰明，老公走得甩有五百萬，走唔甩有一千萬，是生是死，最著數都係佢。嗱！呢個世界唔駛創業食腦，日常食腦就攪掂！」

　　「我估個老婆買重咗老公嘅人壽保險，贏雙份。」

　　「你地唔好咁市儈，其實故事嘅意義係：每一個肯努力嘅男人後面，都有一個有動力嘅女人！」

　　在相學上，有如此推動力的女人有以下特徵：

　　一、眼神特別銳利，帶點不屑和唔抵得：這種人對機會、對向上流、對向錢看都特別敏感，如果自己沒有學歷、能力去發展事業，就會將野心虛榮全寄託在老公身上，不斷催促他上進、提議他向老闆要求加薪、叫他多做幾份工，或者提醒他走精面，或「造就」他作以上終極挑戰。人際關係也特別差，不太可愛。

　　二、顴高：顴骨高聳配眼神銳利，表示此人要求極高，自己有本事，就飛揚跋扈；冇本事就靠家人、朋友、丈夫去四圍威。不過若只是顴高而不眼利，則代表心急而已，不一定是厲害角色。

　　若兩種特徵都集齊，咁佢老公真係日日生活喺鱷魚潭咧！