最近滿心歡喜，因為請咗位靚女。

　　其實佢輪廓並非特別標青，仲有少少假哨牙，但就勝在甜。佢身材高佻、打扮時尚，最攞命係笑起上嚟，大大桃花眼咪成一線，整塊面就幻化成一朵桃花，特別俏。

　　佢又唔係虛有其表喎！有樣子有腦子，難得仲肯帶個腦返工！喺適當時候甚至Query客戶提供嘅資料。嘿！仲畀佢捉到D破綻添。

　　如此人才，我當然悉心呵護，佢返工一周後，我問佢：

　　「做成點呀？有冇人蝦你？」

　　「冇呀！佢地對我好好！」佢答。

　　我心想：你好彩囉，有新人畀同事鬧到喊呀！

　　「放工夜嗎？」我問。

　　「上個禮拜有一晚啫。」

　　「咁夜你唔係一個人嘛？」

　　「唔係！好多人陪我！」

　　呢！呢個世界，人靚夾識撈，真係唔同嘅。佢自動會打通公司嘅任篤二脈，唔駛我嚟粗心。我正在深慶得人，佢有日怯生生敲門，遞上大信封。

　　「三個禮拜咋喎，咁快就跳糟？」我問。

　　「我真係對你唔住，不過唔係為錢。」

　　原來係為愛。

　　「我喺呢三個禮拜內，識咗位專業人士，現在發展緊感情，但呢度放工時間唔定，佢投訴，話煮嘢畀我食預唔到時間，我衹好轉份朝九晚五嘅工，我真係好唔好意思！」

　　「雖然我捨唔得你，但我係你一樣會咁做。」我答。

　　你話我懶大方都好啦，真係天要下雨、娘要嫁人、美女要鬆人，誰擋得住。佢啱啱坐喺公司嘅東南方，巧流年九紫星所在，唔怪得佢話發霉咗一年，一坐嗰個位，就喺遊艇上遇上青年才俊，火速兩情相悅，已發展至煮飯仔階段。當然，亦可能咁啱得咁蹺啦。

　　靚女走後，好多人爭住坐佢個風水位，梗係啦！桃花事業肯定緊要過職場事業啦！