職場與靈魂有乜關係呢？

　　係有嘅，會影響你有冇人工加、有冇花紅分，甚至有冇機會被炒魷！

　　呢個近乎靈性嘅問題其實係有段故嘅。

　　話說有一次，敝公司員工「豬仔包」又遲到，這已經是第N次了，每次遲兩粒鐘，我明白她住在離島，交通需時；又欣賞她愛心爆棚，收養了流浪的貓貓狗狗；亦了解她每天要餵貓狗、應酬倉鼠和訓練那所有鄰居都想毒啞的鸚鵡。她自己也曾向同事透露，這些比上班還要累。因此有時你以為她在電腦熒光幕前沉思度蹺時，她其實是在夢鄉搜索靈感。

　　廣告公司的生態環境是很有趣的，紀律這回事，不可抓得太緊，因為全人類都自以為是藝術家，因此應享有相應的輕狂浪蕩和顛倒常規，你哋成日話要跳出框框嘛！可惜我還未看到天才的曙光；但若完全放棄紀律，則對唔住那些盡忠職守的乖員工，而我亦難向其他合夥人交代，所以要「的」豬仔包入房傾傾。

　　「曉以大義」之後，我問她有甚麼回應。

　　她很哲學地答：「我可以準時返工，不過只得個軀殼咋噃！」

　　我於是很溫柔地問：「咁係你個靈魂定係軀殼出糧㗎？」

　　她無言以對，因為魂魄未返嚟，我唯有結案陳辭：「你有時間就同你靈魂講下數啦！」

　　轉眼已到公司評核表現的時候，當我訪問同事們對豬仔包有何評價時，竟出現了兩極的反應：

　　「唉！有時都幾甩漏㗎，叫佢做十樣，次次都做得一半，要Check得好實，否則孭鑊。」

　　「吓！幾精靈㗎，又快手，有時仲有好建議，提返我添。」

　　拍擋不明白為何有如此兩極的評價，我突然想起豬仔包的軀殼理論。

　　「理由好簡單，就係睇嗰日佢有冇帶靈魂上班」我說。

　　大家登時恍然大悟。

　　豬仔包生就一雙「睡眼」，不單是惺忪睡眼，亦吻合相學中形容缺乏焦點的眼神，這種人常常只得個軀殼在操作，要等靈殼合一，才有表現，我唯有希望豬仔包嘅魂魄多啲返嚟公司巡吓啦！