港姐冠軍馮盈盈並非以美貌爆鏡、或智慧爆燈而出名，乃因順暢爆粗而吸睛。

　　論相，其最大缺點是上唇左右不對稱，左邊較薄，右邊較厚，而且中間起啄，表現在行事作風上，有時稍欠分寸，鍾意講乜就講乜。以至出名之後，被網民起底，將她在佔中期間的魚蝦蟹全部拿出來翻炒，又是一頓傳媒盛宴。

　　當年高永文局長指：並無數字顯示佔中阻礙急救，她即揶揄梁特首：「而家自己人都撐你唔落，再次Ｘ到無眼睇……」

　　對於鍾樹根，佢當然饗以草根問候：「全盛時期嘅tree gun到底要Ｘ幾多鑊先夠？」

　　咁係好克制，對於反佔中阿伯抓向女示威者胸部，她施展了看家本領：「Ｘ街Ｘ街Ｘ你老Ｘ冚家Ｘ……。」

　　係，義憤填膺。不過係咪一定要以語言暴力回應行為暴力呢？對於自己多次爆粗，她的理由是：

　　「我係香港土生土長嘅，好關心香港嘅時事，愛之深、責之切，所以特別有強烈嘅情緒，先會有啲較激嘅言論。」

　　好在唔係人人都以佢嘅方式愛港，否則香港一定變成粗口之都、粗中之粗！

　　上唇左右不對稱另一特徵，好聽叫靈活，即看風駛艃，轉軚勁快，把口勁乖！

　　她當選後接受傳媒訪問，立即淑女上身，強調自己平日言行絕非如此，只是在FB這較私人的平台，才這樣向最親的朋友抒發情緒，並說：

　　「平時言行，同人日常交往，冇可能講呢啲嘢，女仔都要斯文啲，唔應該講！」

　　職場上也有不少這樣的叻仔叻女。

　　如果你遇到上唇欠對稱、眼神欠磊落的老細，他答應給你甚麼，都要白紙黑字；有這樣的下屬，你要定期跟進其工作進度，而且必須指明交貨時間，否則他會有一百種方法耍你。

　　如果你在商場上遇到上唇明顯左右不均的對手，配眼神張揚的，他會大你；配眼神閃爍的，他會算你；配眼神陰沉的，他會跣你。

　　這些人的共通點，是善於以今日的他，打倒昨日的他，順便打倒埋今日的你！