05/09/2019
連登仔識全球登報玩文宣?政府:我夠識咯!
連登仔為咗可以令全球關注香港情況,早前搞左兩次喺美國《紐約時報》、英國《金融時報》西班牙《世界報》、法國《世界報》、日本《日經新聞》等13 國媒體登廣告嘅行動,廣告費眾籌仲極速超額逾倍完成,設計同內容亦短時間內搞掂,Jenny唔少做開廣告同Marketing嘅朋友仔都嘖嘖稱奇,大叫CRAZY!唔知係咪見到連登仔全球登報得到好大反響,政府一於「跟!再大你!」,今日就有人同Jenny報料,話見澳洲嘅《澳洲金融評論報》(Australian Financial Review)已經有一版全版「Hong Kong」廣告,誓要「以正視聽」咁話呀!
政府廣告: 你睇到拼圖嘅一部分咋!
講返今日個廣告先,設計就簡簡單單(見圖),入面就話大家可能讀到、看到和聽到好多有關香港嘅事和示威活動。但你睇到嘅或者喺社交媒體Share嘅嘢,都只是香港呢個咁複雜嘅社會、經濟同政治拼圖嘅一部分咋!總之,我地反對暴力,堅持「一國兩制」,香港依然係個「安全、開放、好客嘅國際都會,係一個同國際相連、充滿活力同動力嘅經濟體。最尾仲Blod 咗字體,「We will no doubt bounce back.We always do.」(我哋一定會重整旗鼓,我哋一向如此。)
一個Template用到老 定會花款多多?
經Jenny打聽,今次政府好揼本,而且想登多幾份「以正視聽」,好等全世界都知香港而家個情況咁話!傳聞個預算有成8位數!小妹即刻去Fact Check下先!點知政府發言人就只係肯講有關嘅廣告會喺未來一、兩個禮拜,會喺澳洲、北美洲、歐洲和亞洲嘅主要報章,(包埋英文同其他語言)登出來。今日喺澳洲金融評論報嗰個就係第一個廣告喇。佢話,因為特首噚日公布咗「四項行動」,所以而家係是適當時機「由特區政府以真誠、坦率嘅態度向國際社會講解我哋嘅看法。」 咁使咗幾錢先?Sorry! 問咗幾次政府發言人都唔肯答!
大家知啦,政府做嘢最緊穩陣,有接過政府Job嘅設計師朋友仔就同Jenny呻過,宣傳單張淨係初稿都要過五關斬六將,先可以Confirm。所以,Jenny就期待其他日子嘅廣告會係點樣樣喇!會唔會好似連登仔咁唔同地區有唔同Design 同內容呢?定係一個Template 用到尾?如果只得一款,就會畀連登仔比下去架喇!政府唔係認輸呀嘛?
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
《說說心理話》【奧運劍擊熱】大師兄張小倫親身分享!贏在起跑線=壓力?如何培育子女有卓越成就?► 即睇