話說年初公布嘅《財政預算案》，大家仲記唔記得有啲咩措施呢？如果你淨係記得$4000嘅話，Sorry囉！你答錯咗喇！$4000已經係上年《財政預算案》嘅事嚟喇！而Jenny最記得嘅就係特區政府要響應阿爺嘅「公廁革命」，拎6億嚟翻新240個公廁！不過而家改革公廁就未有聲氣，反而另一個預算案焦點－－勞福局話要直接拎200億出嚟買物業嚟整社福設施，今日就有文件交咗上立法會喇！

業主們機會嚟喇！

　　之前政府喺《財政預算案》記者會上就話，計劃撥款200億元買60組物業，預計可以提供130個設施。今日份文件就顯示咗會加碼，可以提供到158個設施，包括48間長者鄰舍中心、28間幼兒中心、15間長者日間護理中心等，預計最後一批物業會喺2023年首季購置，2023年底至2024年初投入服務，但政府今日就仲未公布確實選址。

　　不過，有議員就計過條數，200億元買60組物業，每組物業大概就要3億，擔心政府咁做會唔會變相「托市」呢？雖然財政司司長陳茂波（波叔）就話以前已有先例，例如回歸前港府曾經喺1995年同樣透過購買物業增加社福設施。而勞工及福利局局長羅致光就話，今次建議購入60個物業，面積介乎千多至逾萬平方呎，只佔上年年底非住宅物業總存量0.1%，「相信影響非常之細」。之但係有政府畀錢，點都安心過喺私人市場放售，或者對唔少業主嚟講今次都係「機會嚟喇！飛雲！」

有設施又有冇人手先？

　　另外，上面都講咗會有28間幼兒中心，而文件亦都講明，計劃喺每區都增設最少1間幼兒中心，而元朗、西貢呢啲有較多年輕家庭嘅地區，仲會重點設置更多幼兒中心添！Jenny都覺得至少每區加多間點都係一件好事，之但係人手方面又配唔配合到呢？Jenny聽聞唔少姐妹都話而家社區保母短缺；如果唔夠人手，就算有地方會唔會都係無補於事㗎？