30/04/2019
袁彌昌的「覺醒」是……?葉劉神級解讀 令人O晒咀!
今日又係一個打仗日!事關朝早係修訂《逃犯條例》法案委員會第二次開會,但係由於上次開咗兩個鐘會都未選到主席,所以Jenny都預視到今日第二次開會應該會延續返上次嘅情況,果然,今日又係選唔出主席㗎~泛民同建制就當然循例互鬧,Jenny都習慣晒喇!但今日就有個議會「新丁」出現,令跨黨派忽然停戰……一陣咁多啦!
Miss Mo一見B囡成個人唔同晒!
BB一出 Miss Mo即變和善
其實會議第一項議程係選主席嘅,不過由於主持會議嘅最資深議員涂謹申先處理咗規程問題先,處理到完會前半個鐘都未搞掂,要同法律顧問休會閉門討論。而喺休會期間,新民黨容海恩就抱咗佢B囡落嚟會議室噃!
BB一出,真係可以化解好多問題!各位建制女性議員母性出晒嚟,圍住B囡轉,連泛民嘅毛孟靜(Miss Mo)都大讚B囡「眉目如畫」!B囡果然係立會嘅親善大使呀!
袁彌昌話遊行係「覺醒」 葉劉神級解畫:「B囡訓醒咗!」
而本身因開咁耐會都未選到主席有啲躁躁地嘅葉劉,見到愛徒嘅囡囡都即刻心花放,笑到見牙唔見眼。不過話說B囡爸爸袁彌昌就喺反修例遊行嗰日喺Facebook出咗個Post,話「Hong Kong has reawakened(香港再次覺醒了)」,唔知身為建制派嘅佢哋點睇呢?點知葉太馬上就神級解畫:「即係B囡訓醒咗咁解!」咁都得?葉太果然從事政界多年,功力真係深厚呀吓!
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
《說說心理話》【奧運劍擊熱】大師兄張小倫親身分享!贏在起跑線=壓力?如何培育子女有卓越成就?► 即睇