政府想急推《逃犯條例》修訂，不過世事又豈會盡如人意呢？今次真係「一波三折」！以為趁泛民甩轆，極速成立法案委員會，再咋咋臨開第一次會就一定趕得切7月休會前過？真係唔好太一廂情願！泛民講明全力接招，又點會令你好過！話說今日法案委員會第一次，又鬧出風波，開咗兩個幾鐘頭會，都選唔到正、副主席，真係「出師不利」呀！

難得有機主持大局 唔係唔「拉布」呀？

　　修訂《逃犯條例》法案委員會咁趕急，左攝右攝，攝咗喺今朝8點45分召開。第一項議程就係選出法案委員會嘅正、副主席。按照議事規則，喺選出正、副主席之前，就由最資深議員主持會議，數數手指，委員會入面，最老資格就係民主黨涂謹申（阿涂），所以呢個重任當然就落在阿涂身上喇！

　　一開波，阿涂先讀出62名議員嘅名，要主持咁多人關注嘅會、讀咁多個人名，竟然畀議會陣線區諾軒提出規程問題，話阿涂讀錯咗民建聯張國鈞個名！而自由黨張宇人就質疑有議員拉布，仲話要睇返Play Back！

郭偉强小學雞上身 鬧阿涂「唔好扮垃圾」

　　轉頭議會陣線毛孟靜又不滿會議安排太倉卒，想傾咗先繼續選主席，但建制派多名議員就質疑涂謹申是否有權處理呢件事。工聯會郭偉强仲唔知點解「小學雞」上身，叫資深議員兼會議主持阿涂「唔好扮垃圾」，又唔肯收回言論；咁阿涂只好請郭偉强離開會議廳，令郭偉强成為立法會史上第一個被叫離會議廳嘅建制派議員。

　　謝偉俊（阿Paul）同Jenny講笑咁講，郭偉强今日獻出咗「第一次」，要封返封利是畀佢！而呢個第一次亦驚動咗一班建制派議員，紛紛出嚟指責阿涂同泛民拉布！仲話會諮詢法律意見，同要求修改議事規則，唔再由最資深議員擔任會議主持，而係靠議員互選產生喎！

　　嗱！Jenny睇返議員資歷排名，資深議員除咗阿涂，同埋唔鍾意開會嘅白頭忠之外，跟數落去嗰10個有9個都係建制派嘅議員，如果真係要互選，唔知會唔會協調得仲耐呢？

阿Paul話仲有絕殺 但會一拍兩散？

　　做會議主持甚艱難，今次被建制派鬧到飛天嘅阿涂事後就同Jenny講，佢已經係按議事規則公正主持會議，經得起任何法律挑戰！而立法會法律顧問都同Jenny證實咗阿涂是次主持會議係按議規。

　　阿涂又話一知道自己有機會做會議主持，就即刻暫停出席民主派同其他組織嘅會議，私下亦唔會談論呢件事，話各位睇到開會經過嘅人，相信都會睇得出佢係公正主持會議咁話！

　　咁對家又點睇呢？阿Paul就同Jenny講，今次建制就「硬食」㗎喇！但係咪冇方法解決？咁又唔係噃！阿Paul話仲有一招絕技可以出，但就會一拍兩散？究竟係咩呢？阿Paul就封實把口，話秘密武器唔可以公開。Jenny真係好想知啊！